Այն, ինչ ասաց Սասուն Միքայելյանը, Փաշինյանի քաղաքական ծրագիրն է․ իշխանություն՝ Արցախի փոխարեն․ Դ․Շահնազարյան
Երեկ՝ նոյեմբերի 26-ին, վարչապետի ժ/պ Նիկոլ Փաշինյանին ավելի շատ զայրացրել էր ո՛չ թե «Իմ քայլը» դաշինքի անդամ Սասուն Միքայելյանի հայտարարության արձագանքները, այլ նրան անսպասելի զայրացրել էր ՀՀԿ-ի միջոցառումը՝ կապված քարոզարշավի մեկնարկի հետ։
Այդ մասին լրագրողների հետ հանդիպմանն ասաց ՀՀԿ համամասնական ցուցակում ընդգրկված Դավիթ Շահնազարյանը, ում խոսքով՝ հիշյալ միջոցառմանն ավելի շատ մարդիկ էր հավաքվել, քան իր երթին։
Ինչ վերաբերում է Սասուն Միքայելյանի հայտարարությանը, ապա Դավիթ Շահնազարյանը նկատեց, որ այն կապված է Արցախյան խնդրի լուծման հետ, որի մասին խոստացավ խոսել առանձին ասուլիսի ժամանակ։
«Այն ժամանակ դուք կհամոզվեք, որ այն, ինչ ասաց Սասուն Միքայելյանը՝ քաղաքական ծրագիր է, որն իրականացնում է Նիկոլ Փաշինյանը․ այսինքն՝ իշխանություն՝ Արցախի փոխարեն»,- ասաց Շահնազարյանը՝ դարձյալ կրկնելով, որ Սասուն Միքայելյանն ուղղակի արտահայտել է այն, ինչը հանդիսանում է ներկայիս իշխանությունների քաղաքական նպատակը։