«Ժամանակ». «Իմ քայլի» ռեյտինգային թեկնածուներն արդեն իրար վարկաբեկում են. ամեն ինչ նոր է սկսվում

«Ժամանակ» թերթը գրում է. ««Իմ քայլը» դաշինքի ռեյտինգային թեկնածուները համարելով, որ կողքից որեւէ մրցակից չունեն, և իրենց իրական հակառակորդները հենց դաշինքի կողմից առաջադրված թեկնածուներն են, ամեն ինչ անում են իրար վարկաբեկելու համար:

Երեւանի Նոր Նորք, Ավան և Քանաքեռ-Զեյթուն վարչական շրջանները ընդգրկող թիվ 1 ընտրատարածքում պատգամավորի թեկնածու է Կարեն Չիլինգարյանը: Այս ընտրատարածքում «Իմ քայլի» մյուս թեկնածուները նրան մեղադրում են կուսակցական ռեսուրսները չարաշահելու մեջ՝ ասելով, որ Չիլինգարյանի հորեղբայրը ՔՊ-ի տարածքային կառույցի ղեկավարն է, եւ այդ ռեսուրսը օգտագործում է բացառապես եղբորորդու համար: Չիլինգարյանի եղբայր Բաբկեն Չիլինգարյանն էլ, ի պատասխան այդ մեղադրանքների, իր ֆեյսբուքյան էջում գրել է. «Ժող ջան, ինչպես անցած տարի, այս տարի նույնպես թիվ 1 ընտրատարածքում «Իմ քայլը» դաշինքի կողմից ռեյտինգային կարգով առաջադրված թեկնածու Կարեն Չիլինգարյանը ինքն է իր քարոզչական պաստառները փակցնում։ Մենք չունենք ռեսուրս, գումարով աշխատող հարյուրավոր մարդիկ, բայց փոխարենը ունենք երիտասարդ թիմ»:

Այս ընտրատարածքից ՔՊ-ի կողմից առաջադրված են նաեւ սփյուռքի նախարար Մխիթար Հայրապետյանը եւ վարչապետ Նիկոլ Փաշինյանի խորհրդական Մեսրոպ Պապիկյանը: ՔՊ-ի ներսում իշխանության համար պայքարը դեռ նոր է սկսվում»:

 Մանրամասները՝ թերթի այսօրվա համարում