Հակոբ Արշակյանն ասուլիսը հրավիրել է ամենաթանկարժեք հյուրանոցի սրահներից մեկում
Այս օրերին նախարարներն իրար հերթ չտալով՝ ասուլիսներ են կազմակերպում. փորձում են իրենց արածն ու չարածն ամփոփել, քարոզարշավին ընդառաջ՝ դիվիդենտներ հավաքել այն առումով, թե իրենց աշխատանքը բաց է և հաշվետու են հասարակության առջև:
Ասուլիսների գաղափարն իսկապես լավն է. յուրաքանչյուր ժողովրդավար երկրում այդպես են վարվում տարբեր ոլորտների ներկայացուցիչներ: Մի խոսքով՝ նախաձեռնությունը ողջունելի է:
Վաղն ասուլիս կտա նաև ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը: Սկանդալներով իր կարիերան սկսած երիտասարդ նախարարն ինչպես սկսեց իր պաշտոնավարումը, նույն ոգով էլ շարունակում է: Վաղվա ասուլիսը դեռ չկայացած՝ աղմուկն արդեն անխուսափելի է: Բանն այն է, որ մեծամիտ նախարարը որոշել է տարբերվել մնացածից և իր ասուլիսը ոչ թե նախարարությունում կամ ինչ-որ մամուլի ակումբում հրավիրել, այլ՝ Հայաստանի ամենաթանկարժեք հյուրանոցներից մեկի՝ նույնքան թանկարժեք սրահում:
Նախարարության տարածած հաղորդագրության համաձայն՝ Արշակյանն իր ասուլիսը կհրավիրի վաղը, ժամը 14:00-ին, «ԱԼԵՔՍԱՆԴՐ ՀՈԹԵԼ» հյուրանոցի «Կարս» սրահում (հասցեն՝ Աբովյան փող., 3/4 շենք):
NEWSPRESS.am-ին հաջողվեց պարզել, որ «Կարս» սրահի 6 ժամյա վարձակալության արժեքը 160.000 դրամ է, իսկ մեկ օրը՝ 220.000 դրամ: Ենթադրենք, որ նախարարը «խնայելով» բյուջեն՝ կվարձակալի 6 ժամով:
Ի՞նչ պետք է ասի ընդամենը մեկ ամիս պաշտոնավարած նախարարը որ չէր կարող ասել, օրինակ, կառավարության մամուլի սրահում, այդ ո՞ր կարևոր խոսքի, հայտարարության համար պետք է բյուջեից 160.000 ծախսվի:
Այս մոտեցումով իշխանություններ մենք երկար ժամանակ ունեցել ենք և հեղափոխությամբ իշխանության եկած ուժի համար նախարարների՝ նման որոշումները պարզապես հարված են իշխանական ողջ թիմին:
Հետգրությամբ նաև կարող ենք ասել, որ Հակոբ Արշակյանը իրականում պարզապես ասելիք չունի և խոսելու է այն, ինչ իր նախորդներն են ժամանակին արել, իսկ ինքը միայն ուրիշների կատարած աշխատանքը կվերագրի իրեն: