Մի օլիգարխի, որ թափ տայիք, էդ 50 մլն դոլարը կդնեիք բյուջե. Հայկ Բաբուխանյանը՝ Ֆինանսների փոխնախարարին
Ձեր կառավարությունը դեմ էր, որ մենք վարկեր վերցնենք և դրանք ծախսենք բյուջեի աջակցության համար՝ ինչպես Դուք եք ձևակերպում: Այսինքն՝ այդ վարկը վերցնում եք, որպեսզի բյուջետային ծախսերը փակվի՝ բաժանվեն թոշակներ, տրվեն սոցիալական նպաստներ: Ազգային ժողովի նիստում Ասիական զարգացման բանկի և ՀՀ կառավարության միջև 2018-ի նոյեմբերի 9-ին կնքված «Հանրային արդյունավետության և ֆինանսական շուկաների ծրագիր. Ենթածրագիր 2» վարկային համաձայնագրի հաստատման հարցի քննարկման ժամանակ Ֆինանսների փոխնախարար Արմեն Հայրապետյանին դիմելով՝ այդ մասին ասաց ԱԺ ՀՀԿ խմբակցության պատգամավոր Հայկ Բաբուխանյանը:
«Եթե այդպես է՝ ինչպե՞ս եք պատկերացնում՝ այդ վարկը հետո ինչի՞ հաշվին ենք վերադարձնելու, եթե դա կոնկրետ գործարանի ստեղծման համար չի վերցվում, ինչ-որ ձեռնարկության համար չի ստեղծվում, որը հետագայում արտադրանք կտա և այդ արտադրանքով կփակենք վարկի վերցրած բեռը, որը նորից ավելանալու է արտաքին պարտքի վրա, և երեք տարի հետո մեր պետությունը պետք է այդ վարկը փակի: Ինչո՞վ է փակելու»,- փոխնախարարին հարցրեց Բաբուխանյանը:
Հայրապետյանը նախ հաստատեց, որ գումարը 50 մլն ԱՄՆ դոլարի մասին է և որ, այո, այդ գումարը պարտքն ավելացնելու է 50 մլն դոլարով. «Ցանկացած բյուջե, որը հաստատվում է դիֆիցիտով, նշանակում է՝ հաջորդ տարի մենք ունենալու մենք դեֆիցիտի չափով ավել պարտք ստանձնած: Այդ առումով՝ առաջիկա տարիներին նույնպես պարտքային միջոցները ստանձնվելու են, և այստեղ մի հանգամանք կա՝ կախված վարկի տեսակից: Կան նպատակային վարկեր, որոնք գնում են դեպի նպատակային ծրագրերը, այսինքն՝ ենթակառուցվածներին են ուղղվում: Կան վարկեր, որոնք ուղղվում ենք ընդհանուր բյուջետային ֆինանսական կայունությունը պահելու համար: Սա հենց այդ նպատակին ուղղվող բյուջետային աջակցության վարկ է»,- ասաց փոխնախարարը՝ հավելելով, որ ապագայում նպատակ կա հրաժարվելու այդ վարկերից վարկ հնարավոր կլինի չվերցնել այն դեպքում, երբ սեփական եկամուտների էական բարձրացում տեղի ունենա:
Արձագանքելով՝ Բաբուխանյանն այս անգամ հարցն այլ հարթություն տարավ՝ հնարավոր չէ՞ր որևէ օլիգարխի գրպանները թափ տալ ու այդ գումարը ստանալ. «Մի օլիգարխի, որ թափ տայիք, էդ 50 մլն-ը կդնեիք բյուջե: Խոսում ենք օլիգարխիայի դեմ, կոռուպցիայի դեմ պայքարի մասին: 50 մլն-ն ի՞նչ էր, որ չկարողացաք օլիգարխիայի, ստվերային տնտեսության, կոռուպցիայի դեմ պայքարում վերցնել, դնել բյուջե, որպեսզի այդ գումարը չծանրանա ժողովրդի ուսերին»,- ասաց Բաբուխանյանը՝ ձևակերպելով հարցը՝ արդյոք հնարավոր չէ՞ր կոռուպցիայի և ստվերային տնտեսության դեմ պայքարից այդ 50 մլնը՝ ոչ մեծ գումարը, հայտնաբերել, բերել-դնել բյուջե, որպեսզի չավելացնեինք բյուջետային ծանրաբեռնվածությունը և արտաքին պարտքի բեռը:
Փոխնախարար Հայրապետյանն էլ պատասխանեց, որ իհարկե, հնարավոր էր, բայց ռիսկային էր. «Իսկ եթե այդ 50 մլնը չկարողանայինք ունենալ ու առաջիկա երկու ամսում ունենայինք ֆինանսական ապահովման խնդիր: Ցանկացած կոռուպցիոն պայքարի, հարկային վարչարարության արդյունավետության միջոցով ստացված հնարավորությունները մեզ հնարավորություն կտան, որ այլևս քիչ ստանձնենք այն վարկային պարտավորությունները և պարտքի կառավարումը գնա դեպի նվազում»,- ասաց Ֆինանսների փոխնախարարը: