Փաշինյանի փողկապն այժմ տեղական արտադրության է
Ինչպես Գեղարքունիքում մարտունեցիների հետ հանդիպման ժամանակ, այնպես էլ այսօր՝ նոյեմբերի 20-ին, լրագրողների հետ հանդիպմանը վարչապետի ժ/պ Նիկոլ Փաշինյանը հայտարարեց, որ «Ես և իմ թիմը ժողովրդի առաջ ստանձնած բոլոր պարտավորությունները լիարժեք կատարել ենք»..
Իհարկե, նա ոչ նախկին վստահությամբ ու առագանությամբ, այլ փոքր-ինչ հուզված և թղթից կարդալով, բայց նշեց մի քանի կետ, թե ինչ է արել ինքն՝ իր թիմի հետ. Սերժ Սարգսյանը հեռացավ, արտոնյալներ չկան, հավասարություն է, կոռուպցիայի դեմ լիարժեք պայքարում են, արտահերթ խորհրդարանական ընտրություններ կլինեն:
Եվ իհարկե, այստեղից Փաշինյանի հետևությունը՝ «Հայաստանի Հանրապետությունում իշխանությունն ամբողջությամբ վերադարձվել է ժողովրդին և իսկապես պատկանում է ժողովրդին»:
Մինչ լրագրողները իրենց հարցերը կուղղեին վարչապետի ժ/պ-ին, նա նաև հիշեցրեց, որ առջևում ԱԺ արտահերթն է, որից հետո նաև զարկ կտա տնտեսությանը և վերջնականապես բոլոր խոստումներն այլևս կատարված կհամարվեն: Բայց մինչ այդ ժողովրդի քվեն են ակնկալում:
Նա նաև լրագրողների ուշադրությունը հրավիրեց իր փողկապին՝ Հայաստանի դրոշի գույներով: Նա նկատեց, որ նույնիսկ դա էլ ապացուցում է, որ ինքն անկեղծ է իր խոսքում և գործողությունների մեջ: Փաշինյանը հիշեցրեց ԱԺ-ում իր վերջին ելույթը:
«Ես ասացի, որ կրում եմ միայն տեղական արտադրության հագուստ՝ բացառությամբ փողկապի, քանի որ արտադրողների չէինք կարողացել գտնել, բայց արտադրողներն արձագանքել են, և ասուլիսից առաջ ես նվեր ստացա երկու տեղական արտադրանքի փողկապ, որոնցից մեկը որոշեցի կրել»,- ասաց Փաշինյանը՝ ցույց տալով իր եռագույն փողկապը:
Այնպես որ՝ այժմ նա կարող է հանգիստ ասել, որ իր հագուստն ամբողջությամբ տեղական արտադրանք է, իսկ գինն առայժմ չի քննարկվում: