Համաներումից դժգոհ կալանավորը սպառնում է կարել բերանն ու հացադուլ հայտարարել
Մինչև համաներման կիրառումը դրա մասին շատ թմբկահարվեց: Է՛լ «աննախադեպ», է՛լ «մեծ ծավալ», է՛լ... մի խոսքով՝ համաներում հայտարարող իշխանությունն այն դրական է գնահատում, իսկ այն իրենց մաշկի վրա զգացողները՝ ոչ: Ավելի ճիշտ՝ նրանք, ովքեր անհամբեր սպասում էին այդ համաներմանը և հույսեր էին կապում դրա հետ՝ վստահ իմանալով, որ համաներումն անպատճառ իրենց վրա անդրադառնալու է, հուսախաբ եղան:
Նախ, նկատենք, որ համաներումը նախընտրական շրջանում հայտարարվեց. ասում են՝ բանտերից դուրս եկողներից շատերը ազդեցիկ են և կարող են պետության «լավության» տակից դուրս գալ՝ իշխող կուսակցության համար ձայներ բերելով: Ինչևէ, չենք քննարկում:
Փաստն այն է, որ այն օրից, երբ համաներման որոշումը սկսեց գործել, NEWSPRESS.am-ն սկսեց ահազանգեր ստանալ քաղաքացիներից, ովքեր դժգոհ էին որոշման արդյունքներից: Ահազանգերից ո՛չ բոլորին ենք անդրադարձել, բայց որոշները լուսաբանվել են:
Շատերը դժգոհ են հեղափոխությունից զուտ այն պատճառով, որ իրենց հարազատի վրա, ինչպես իրենք են ասում, «կարովի» գործը չի վերանայվել:
Իհարկե, տրամաբանական է, որ ոչ բոլորը գոհ կլինեն, սակայն մարդիկ, ովքեր ներկայացնում էին իրենց խնդիրը, իսկապես անուշադրության են մատնված: Օրերս էլ կալանավայրից մեզ ահազանգեց մի բանտարկյալ, ով առայժմ չցանկացավ հրապարակել իր անունը, բայց ասաց, որ վճռական է տրամադրված: Համաներումը նրա վրա չի անդրադարձել, այն դեպքում երբ վերջինս վստահեցնում է, որ իր դրական վարքագծով աչքի է ընկել կալանավայրում, և բոլորը գոհ են իր պահվածքից, գործն էլ հիմնավոր չէ:
Տղամարդը նեղսրտած էր, որ նույնիսկ չեն էլ փորձել գործը վերանայել:
«Գիտե՛ք, այդքան չէի վրդովվի, եթե մեր աչքի առաջ համաներման արդյունքում մանկապիղծներ չազատվեին. ախր ոնց կարելի է երեխու բռնաբարության հոդվածով մանկապիղծն ազատվի, իսկ ոչ լիարժեք հիմնավորմամբ մեղադրանքով սարքված գործով նստածը՝ ո՛չ: Դա՞ է արդարությունը»,-նեղսրտած իրավիճակն էր ներկայացնում կալանավորը:
Նա ուզում էր համոզվել, որ լրատվամիջոցները իր կողքին կլինեն, երբ վճռական քայլերի գնա: Նրա հաջորդ դատական նիստը հունվարին է նշանակված, և քաղաքացին որոշել է՝ եթե այս անգամ էլ չարդարացրին իրեն, կկարի բերանն ու հացադուլ կհայտարարի, կամ ոտքերը կմեխի հենց կալանավայրի կենտրոնում:
«Լա՛վ, սարքեցին գլխիս, դատեցին՝ լավ արին, բա հիմա ինչի՞ չի վերանայվում, եթե իրոք իրավիճակ է փոխվել: Բա չե՞ն տեսնում, որ փաստերը հիմնավոր չեն, բա չեն ասո՞ւմ, որ երեք անչափահաս երեխա ունեմ. 2 տարի ու կես նստել եմ, ինձ լավ եմ պահել, ուրեմն ոչ մի բան հաշվի չե՞ն առնում»,-ասաց տղամարդը՝ հավելելով, որ ևս 6 տարի ու կես էլ, այս պահի դրությամբ, պետք է կրի պատիժը:
Նա միշտ մտածել է, որ համաներման ժամանակ կվերանայեն իր գործն, ու ամեն ինչ իր տեղը կընկնի: Երբ հեղափոխություն է տեղի ունեցել, նա ավելի է հույսով լցվել, քանի որ հավատացել է, որ դատական համակարգը կփոխվի, ու ամեն ինչ լավ կլինի:
«Ախր նրանք, ովքեր կարեցին էս գործն իմ վրա, հիմա չեն աշխատում, ազատվել են աշխատանքից: Չեմ հասկանում՝ բա ինչի՞ չեն դրանց կարած գործերը վերանայում»,-ասաց կալանավորը: Նա նաև խնդրեց. «Մի բան եմ հիմա ուզում. եթե դատական նիստի ժամանակ ինձ նորից մերժեն՝ որպես բողոքի նշան բերանս կարելու եմ, բայց կարո՞ղ եմ ձեր վրա հույս դնել, որ մինչ այդ զանգեմ ու խնդրեմ գաք լուսաբանեք»,-հարցրեց տղամարդը:
Իհարկե,նմենք նրան չմերժեցինք, և պետք է լուսաբանենք, սակայն ուզում ենք նաև պատկան մարմինների ուշադրությունը հրավիրել խնդրին և նկատել՝ շատ են կալանավորները, ովքեր իսկապես ուրիշի մեղքն են կրում բանտում, ու եթե հեղափոխություն, ապա թող հեղափոխությունը կալանավայրեր ևս մտնի...