Երկրին շոումեններ պետք չեն. նախարարն ու մարզպետը թքած ունեն ինֆեկցիոն ԲԿ-ի աշխատողների վրա (ֆոտո)
Ինչպես շատ ՔՊ-ականներ, այնպես էլ Լոռիի նորանշանակ մարզպետ Անդրեյ Ղուկասյանը չի սիրում խոսել թերացումների ու բացթողումների մասին և ամեն ինչ ներկայացնում է գունեղ: Մեծ հաշվով, նախկին իշխանությունը ևս սիրում էր քողարկել խնդիրները, բայց ի տարբերություն նրանց՝ նոր իշխանության ներկայացուցիչները թերացումները լավ քողարկելու համար՝ շոուներ են սարքում:
Մասնավորապես, վերջին դեպքերին անդրադառնալով՝ նշենք, որ Անդրեյ Ղուկասյանի մասին հազիվ թե որևէ մեկը լսած լիներ, մինչև նրա՝ փոխմարզպետի պաշտոնը զբաղեցնելը: Գոնե Վանաձորից դուրս, հաստատ նրա մասին որևէ մեկը չէր լսել: Նա փոխմարզպետ դարձավ աղմկոտ շոուով:
Շատերը հիշելիս կլինեն, թե ինչպես նա ֆեյսբուքյան իր էջում տեղադրել էր ժառանգություն ստացած դատարկ աշխատասենյակի լուսանկարը:
Անկեղծ լինելու համար, եթե չլիներ այս շոուն, այդպես էլ երևի ոչ ոք չէր իմանա, թե ով նշանակվեց Լոռու փոխմարզպետ: Ով ինչպես գնահատեց նրա արարքը՝ կարևոր չէ, նրա համար կարևորը շոուն էր, որի ազդեցության տակ ընկած ՔՊ համախոհները նույնիսկ չկարդացին ու չիմացան դատարկ սենյակի իրական պատճառը: Մինչդեռ աշխատասենյակը զբաղեցնող նախկին փոխմարզպետը պարզաբանել էր իրավիճակը:
Այնուհետև ՔՊ-ական փոխմարզպետը ներքին ու արտաքին պայքար սկսեց ԲՀԿ-ական մարզպետի դեմ: Չքննարկենք պատճառահետևանքային կապերը... կարևորը, որ Անդրեյ Ղուկասյանի աստղային ժամը հասավ. հոկտեմբերի 2-ի միջադեպը նրա համար բախտորոշ էր: Պաշտոնից ազատված ԲՀԿ-ական մարզպետի փոխարեն նա ստանձնեց մարզի ղեկը: Նա, նորանշանակ մյուս մարզպետերի նման, հայտարարեց, թե հեղափոխությունը մարզ է տանելու: Թե ինչ նկատի ուներ նա, պարզ չէ, հատկապես որ մարզում դեռևս էական փոփոխություններ չեն եղել, եթե չհաշվենք, որ պետական որոշ կառույցներից որոշ մարդիկ ազատվել են: NEWSPRESS.am-ի տեղեկություններով էլ, մի քանիսին առաջարկվել է պաշտոնում մնալու համար՝ համալրել ՔՊ-ի շարքերը:
Ինչևէ, մարզպետն առայժմ շոուներ է սարքում՝ նախորդների ձեռքբերումները վերագրելով իրեն: Այդպես. օրերս Վանաձորում շահագործման հանձնվեց բժշկական համալիր կենտրոնը, որի շինարարությունը սկսվել էր դեռ 2013 թվականի նոյեմբերից:
Այս մասին մարզպետը ֆեյսբուքյան իր էջում գրառել է...
Ինչպես և առողջապահության նախարար Արսեն Թորոսյանը, այնպես էլ Լոռու մարզպետն այս շինարարության հետ որևէ աղերս չունեն, և սա նրանց ձեռքբերումը չէ: Այն, ինչ կարող են անել այս նորանշանակ պարոնները, այն է, որ Վանաձորի ինֆեկցիոն հիվանդանոցը չլուծարեն: Ավելի ճիշտ՝ լուծարման մասին լռում են, թեև համապատասխան հրամանում ասվում է, որ այն պետք է լուծարել, քանի որ խնայողություններ են արվելու: Ու չի քննարկվում, թե այդ խնայողություններն ինչի կամ ում հաշվին են արվելու:
Մարզպետն ասում է, որ այն պարզապես ուզում են տեղափոխել նորակառույց ԲԿ-ի շենքը, սակայն այստեղ կա այլ խնդիր:
Նոր շենք տեղափոխվելով՝ կրճատվում է հիվանդների մահճակալների թիվը, հետևաբար նաև՝ բուժաշխատողների: Այդ է պատճառը, որ նրանք չեն ուզում նոր մասնաշենք տեղափոխվել:
Հատկանշական է, որ Թորոսյանը ԲԿ-ի բացման ժամանակ նույնիսկ չի էլ ցանկացել հանդիպել ինֆեկցիոն հիվանդանոցի աշխատողների հետ: Իսկ մարզպետն իր հերթին չի ջանացել խնդիրը դնել նախարարի աշխատանքային այցի օրակարգում:
Կարևորը բացման հանդիսավոր շոուն ստացվեց, կենացներն ասվեցին, իսկ ինֆեկցիոնի խնդիրն օտար աչքից հեռու կլուծեն, իհարկե, ոչ հօգուտ բուժանձնակազմի:
Նախարար Թորոսյան Արսենը հպարտությամբ հայտարարեց, թե ինֆեկցիոն հիվանդանոցի տեղն էլ չգիտի նույնիսկ, բայց լսել է, որ վատ են պայմանները և որոշել է փակել: Նա նաև ասաց. «Եթե պետք եղավ որևէ տեղ որևէ ԲԿ բացել՝ պետք է բացենք, իսկ եթե պետք եղավ փակել՝ փակելու ենք», իսկ թե այս պարագայում ում է պետք փակել ինֆեկցիոն ԲԿ-ն՝ չի քննարկվում...
Արմինե Մկրտումյան