Հայուհու հետ նկարի համար ադրբեջանցու հայրենակիցները սպառնացել են սպանել․ նրան համարում են դավաճան (ֆոտո)
Ադրբեջանից 20-ամյա Թեհրան Բայրամովը ցնցել էր հայ օգտատերերին` հայազգի Ասյա Խաչատրյանի հետ իր լուսանկարները տեղադրելով Facebook-ում:
Հայաստանում շատերը բացասաբար ընդունեցին հայի և ադրբեջանցու կապը։ Սակայն պարզվում է՝ ոչ միայն Հայաստանը, այլև Ադրբեջանը ևս ցնցված է նրանց հարաբերություններից։ Haqqin.az-ը զրուցել է Թեհրան Բայրամովի հետ։
Երիտասարդի ընտանիքն ապրում է Բաքվում, իսկ ինքը ճանապարհորդում է։ Թեհրանը նշել է, որ Ասյան և ինքը ծանոթացել են սոցցանցի միջոցով։ Նրանք աստճանաբար ընկերացել են և որոշել հանդիպել Վրաստանում։
Վրաստանում նրանք մնացել են 2 օր, որից հետո Ասյան վերադարձել է Հայաստան։ Կայքի հարցին, թե մտավախություն չկա՞ր, որ լուսանկարը բացասական արձագանք կգտնի Հայաստանում և Ադրբեջանում, երիտասարդը պատասխանել է, որ Ասյան անհանգիստ էր, ու հիմա նա տղայի համար է մտահոգված։
«Ես չեմ կարծում, որ այդ լուսանկարների պատճառով այդքան աղմուկ կբարձրանա։ Այս լուսանկարները տեղադրելով՝ հույս ունեի, երկու կողմի մարդկանց միացնել, սակայն արձագանքը բացասական էր։ Ես առճակատվեցի ուժեղ հարձակման հետ։ Ինձ վիրավորում էին, եղան նաև մարդիկ, ովքեր ինձ մահով էին սպառնում։ Բայց ես դրանց նշանակություն չեմ տալիս։ Միևնույն ժամանակ, լավ զգացի, երբ և՛ Հայաստանից, և՛ Ադրբեջանից եղան նաև աջակցողներ»,- ասել է Բայրամովը։
Նա նաև հավելել է․ «Ադրբեջանում շատերն այժմ ինձ համարում են հայրենիքի դավաճան․․․ Ո՛չ, ես չեմ մոռացել Ղարաբաղում սպանված մայրերին, երեխաներին ու մյուս անմեղ զոհերին, բայց ես չեմ ուզում, որ էլի ադրբեջանցիներ մահանան․․․ ես ասում եմ՝ ՍՏՈՊ»։