Աշոտ Գրիգորյանն աշխատանքային հանդիպում է ունեցել Սլովակիայի Ազգային խորհրդի առաջին նախագահի հետ (տեսանյութ)
EU-Asia Business Finance Center հոլդինգի նախագահ Աշոտ Գրիգորյանն աշխատանքային հանդիպում է ունեցել Սլովակիայի գալիք տարվա նախագահական ընտրություններում նախագահի թեկնածու, Սլովակիայի Ազգային խորհրդի առաջին նախագահ Ֆրանտիշեկ Միկլոշկոնի հետ:
Ողջունելով միմյանց՝ Աշոտ Գրիգորյանը և Միկլոշկոն քննարկել են Հայաստանում տիրող քաղաքական իրավիճակը։
Պարոն Գրիգորյանը նկատել է, որ իրավիճակը բավականին բարդ է, և նշանակված են ՀՀ Ազգային ժողովի արտահերթ ընտրություններ: Բացի այդ, չափազանց կարևոր են Արցախի շուրջ ընթացող գործընթացները: Այսօր Հայաստանը հայտնվել է արտաքին ուժերի կիզակետում, և անհասկանալի է, թե ինչ զարգացումներ տեղի կունենան:
Պարոն Միկլոշկոն նշել է, որ Արցախը կորցնելու դեպքում Հայաստանը գոյություն չի կարող ունենալ: Այնուհետև նշվել է, որ տպավորությունը Թուրքիայում տեղի ունեցած չորս երկրների ԱԳ նախարարների (Իրան, Թուրքիա, Ադրբեջան, Վրաստան) հանդիպումներից շատ տխուր էր:
Աշոտ Գրիգորյանը հավելել է, որ առաջին անգամ հակահայկական հայտարարություն է արել Իրանի բարձրագույն ներկայացուցիչը, և սա բավականին ուժեղ ակնարկ է Հայաստանի այսօրվա իշխանություններին, որի հետ պետք է լուրջ հաշվի նստել:
Պարոն Միկլոշկոն նշել է, որ ակնհայտորեն Արցախի դեմ կանգնած ուժերն իրենց սեփական կարևոր հետաքրքրություններն ունեն: Ինչպես հայտնի է, Իրանի դեմ պայքարում ոչ մի բանի առաջ չի ուզում կանգնել ԱՄՆ-ն: Անկասկած, շատ ադրբեջանամետ են Իսրայելը և ԱՄՆ-ի հրեական լոբբինգը: Գրիգորյանը հավելել է, որ պանթյուրքական քաղաքականության հիմնական խոչընդոտը հանդիսանում է Հայաստանը, որի վերացման դեպքում կմիանան միմյանց բոլոր թրքախոս մահմեդական երկրները: Լուրջ խնդիր է հանդիսանում վերը նշվածը նաև Ռուսաստանի համար, քանզի թուրքալեզու ռուսաստանյան տարածաշրջանները նույնպես կդառնան պանթյուրքական քաղաքականության ջատագովը:
Այնուհետև պարոն Գրիգորյանը ներկայացրել է «Քաղաքական և տնտեսական վերլուծությունների ու կանխատեսումների համաեվրոպական կենտրոն – Դաշինք հանուն խաղաղության պահպանման (ՊԱՆԱՊ - Դաշինք հանուն խաղաղության պահպանման)» կազմակերպության կողմից կազմակերպվող «Եվրամիություն. ինքնիշխան եվրոպական երկրների միավորում, թե՞ Բրյուսելի թելադրանք» խորագրով սիմպոզիումի շուրջ տեղեկատվություն, որի շրջանակներում տեղի են ունենալու հետևյալ պանել-քննարկումները.
1. Եվրոպական Միություն և Եվրասիական տնտեսական միություն. մրցակցություն, թե՞ համագործակցություն
2. Սլովակիայի ներուժը որպես կապող օղակ եվրոպական երկրների և Արևելյան Եվրոպայի միջև (Ռուսաստան, Բելառուս, Հարավային Կովկաս)
3. Հայաստանը որպես նոր պլացդարմ՝ դիմակայելու իսլամական ծայրահեղականությանը և ահաբեկչությանը
4. Մեծ Մերձավոր Արևելք. խաղաղ գործընթաց կամ համաշխարհային պատերազմի վտանգ
5. Քաղաքականություն և տնտեսություն. պատժամիջոցներն ու պրոտեկցիոնիզմը որպես զարգացման արգելադրման գործիքներ (Առևտրի համաշխարհային կազմակերպության վերջին ցուցումները)
Աշոտ Գրիգորյանը նշել է, որ սիմպոզիումն ունենալու է երկու մաս. առաջինը կայանալու է ս.թ. դեկտեմբերի 10-ին Բրատիսլավայում, իսկ երկրորդը՝ գալիք տարվա մարտ ամսին Աստանայում:
Վերջում Գրիգորյանը մաղթել է հաջողություն պարոն Միկլոշկոյին նախագահական ընտրություններում և հույս հայտնել, որ հաջորդ այցը Հայաստան և Արցախ գուցե լինի պարոն Միկլոշկոյի նոր կարգավիճակում: