«Ձերբակալվելու օրը Սևանում հրավառություն է արել, անձնական շահագրգռություն կա». խոշտանգման մեջ մեղադրվող ոստիկանի մայրը վստահ է՝ որդին արդար է
Այսօր ՀՀ գլխավոր դատախազության դիմաց էին հավաքվել Սևանի ոստիկանության բաժնում կասկածյալին խոշտանգելու մեջ մեղադրվող ոստիկանների հարազատները:
Ավելի ուշ բողոքի ակցիայի մասնակիցներին դատախազությունում ընդունել են Գլխավոր դատախազության հատկապես կարևոր գործերով քննության վարչության պետ Վահագն Մուրադյանը և տվյալ գործով նախաքննության օրինականության նկատմամբ հսկողություն իրականացնող դատախազը:
Բանն այն է, որ ոստիկաններից երկուսը գրավի դիմաց, մյուսը՝ ստորագրությամբ ազատ էին արձակվել, սակայն գրավով ազատ արձակված Վահագն Միքայելյանը նոյեմբերի 6-ին կալանավորվել է:
NEWSPRESS.am-ի հետ զրույցում նրա մայրը՝ Անահիտ Պետրոսյանը, նշեց, որ դատախազն ասել է միայն, որ նախաքննությունը ցույց կտա: Ինքն էլ հարցրել է, թե ինչու է կալանավորվել որդին, չէ՞ որ գրավի դիմաց ազատ էր: Դատախազությունից պատասխանել են, որ հնարավոր է Միքայելյանը խոչընդոտեր նախաքննության ընթացքին:
Պետրոսյանը նշեց, որ գործով տուժողը, ըստ ՀՔԾ հաղորդագրության, Ա. Մ.-ն, միջադեպի ժամանակ, երբ դիմադրություն է ցույց տվել ոստիկաններին, ասել է՝ կտեսնեք, ես ձեզ դատելու եմ, ոտս դրած «գազին»՝ գնալու եմ, հետ գալ չկա:
Կինը պատմեց, որ Սևանի բնակիչը, ում, ըստ մեղադրանքի, խոշտանգել են ոստիկանները, նրանց ձերբակալվելու օրը Սևանում հրավառություն է արել, որ տեսեք՝ ես իմ նպատակին հասա. «Ինքը 4 անգամ դատված հանցագործ է»,- նշեց կինը:
Մեր հարցին, թե՝ եթե իր պնդմամբ որդին անմեղ է, ապա ո՞րն է տուժողի շահագրգռվածությունը, որ նման բան աներ, Անահիտ Պետրոսյանն ասաց. «Այնտեղ ինչ-որ անձնական հարցեր կան, Վահագն իր ընկերոջն է բռնել: Նախկինում ինչ-որ դեպք է եղել: Իրենք տրամադրված են: Անձնական շահագրգռություն կա իրենց մեջ»,- ասաց ոստիկանի մայրը:
Դիտարկմանը, թե, փաստորեն, ճանաչե՞լ են միմյանց տուժողն ու ոստիկանները, Պետրոսյանը նշեց, որ նրանք շատ վաղուց գիտեն իրար:
ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանն էլ դատախազությունում տեղի ունեցած հանդիպման վերաբերյալ NEWSPRESS.am-ին հայտնեց, որ այնքանով, որքանով թույլատրելի է եղել քրեական գործի նախաքննության շրջանակներում, տրվել են համապատասխան պարզաբանումներ՝ ներկայացված դատարական որոշումների վերաբերյալ:
Հիշեցնենք, որ ոստիկանության ծառայողներին մեղադրանք է առաջադրվել ՀՀ ՔՕ-ի 309.1 հոդվածի 2-րդ մասի 4-րդ կետի հատկանիշներով՝ խոշտանգում: Վերջիններս մեղադրվում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու մեջ: Նախաքննությունը շարունակվում է: