Է, բան էր՝ ասացի
Մի ամբողջ ամառ աղբի գարշահոտություն շնչող երևանցիները շունչները պահած սպասում էին, որ Տարոն Մարգարյանի հեռացմամբ ու «Փաշինյանի մարդու» կարգմամբ Երևան քաղաքը կձերբազատվի աղբից և քաղաքացին կապրի մաքուր Երևանում:
Բայց արի ու տես, որ, որ Տարոն Մարգարյանին Հայկ Մարությանով փոխարինելը որևէ դրական էֆեկտ չունեցավ հեղափոխություն տեսած մեր մայրաքաղաքի վրա:
Պարզվում է, որ գարշահոտությունն ինչպես շնչել ենք մի ողջ ամառ, նույնպես շարունակելու ենք շնչել նաև մի ողջ աշուն, որովհետև նորաթուխ քաղաքապետը չի կարողանում խելքին զոռ տալ ու քաղաքի զիբիլը հավաքել, ուստի այստեղ ճիշտ ժամանակն է ցիտել մարությանական որոշ խոստումներ.
«Ուսումնասիրելու ենք ոլորտը, երկրորդ կամ երրորդ օպերատորներ ենք մտցնելու ոլորտ»,-քարոզարշավներից մեկի ժամանակ ասել էր Մարությանը՝ խոստանալով, որ Երևանը մաքրվելու է աղբից: Պարզվում է՝ նրան բավականին երկար ժամանակ է պետք այդ ուսումնասիրությունները կատարելու համար, որովհետև այն, ինչ արձանագրել ենք երևանյան համայնքներում, փաստում է, որ տված խոստումները տվել են 0 արդյունք:
Հետաքրքիր է նաև այս հարցում ֆեյբուքահայության որոշ հատվածի դրսևորած վարքագիծը: Շատերը կհիշեն, թե ՔՊ-ական ֆեյքերն ամռան օրերին որքան ակտիվ էին աղբով լի Երևանի նկարները ֆեյսբուքում հրապարակելիս, որով ցանկանում էին ասել, թե Տարոնի պահած քաղաքն է սա, ծանոթացե՛ք: Զարմանալիորեն, նրանք լուռ են այս օրերին, մինչդեռ օբյեկտիվ կլիներ աղբակույտերով հարուստ Երևանից նկարներ հրապարակել՝ ցույց տալով Մարությանի պահած քաղաքի տեսքը:
Այն, որ խոստումներն ուղղակի ասվել են ասվելու համար, պարզ է դառնում, երբ հետևում ես ժողովրդի հաշվին բարձրաստիճան պաշտոնյա դարձած Մարությանի քաղաքապետության ընթացքին, որը, մեղմ ասած, խայտառակ կարելի է որակել:
Մարությանի ասածն ու արածն իրար հետ չեն համընկնում նաև, երբ հետևում ես քաղաքապետարանում նրա վարած կադրային քաղաքականությանը: Ստացվում է՝ պաշտոն ձեռք գցելը բավարար չէր, հիմա էլ դրանից բաժին է հանում նաև իր ծանոթներին՝ մաքրելով քաղաքապետարանը որակյալ կադրերից:
Հայկ Մարությանի պարագայում ճիշտ և ճիշտ՝ ասացի, հո չարեցի տարբերակն է գործում, որը նաև սկսել է գերիշխող դառնալ նրան քաղաքականություն բերած Փաշինյանի պարագայում, քանի որ ակտուալ է դառնում «խոստացածի քանի՞ տոկոսն եք կատարել, պարոնա՛յք» հարցադրումը: