Եթե Հայաստանը ելք չգտնի տնտեսական վիճակը բարելավելու՝ կգործի դոմինոյի էֆեկտը. քաղաքագետ (տեսանյութ)
Հայաստանը բարդ իրավիճակում է հայտնվել, բայց ասել, որ երկիրը հաղթաթուղթ չունի արտաքին և ներքին քաղաքական հարցերը կարգավորելու համար՝ սխալ կլինի։ Այդ մասին «Անդրադարձ» մամուլի ակումբում հրավիրված մամուլի ասուլիսի ժամանակ հայտարարեց ռուսաստանաբնակ քաղաքագետ Կարինա Գևորգյանը։
Նրա դիտարկմամբ՝ Հայաստանը կարող է կամուրջ դառնալ Եվրամիության և ԵՏՄ-ի միջև։ Ըստ քաղաքագետի՝ եթե այսօր այդ դիրքերը չամրապնդվեն, ապա ԱՄՆ նախագահի Ազգային անվտանգության հարցերով խորհրդական Ջոն Բոլթոնի այցի և հայտարարությունների ֆոնին, իրավիճակը դառնում է մտահոգիչ։
«Այսօր ԱՄՆ-ն գործում է ԵՄ-ի դեմ, և այստեղ Հայաստանը շատ բարդ իրավիճակում է հայտնվում։ Նա կարող է իր հարաբերությունները սրել միաժամանակ և՛ ԵՄ-ի, և՛ ԵՏՄ-ի հետ։ Իսկ, ինչպես ռուսական ասացվածքն է ասում ՝ Лучше синица в руках, чем журавль в небе (ավելի լավ է ճնճղուկը ձեռքիդ, քան կռունկը՝ երկնքում). հիմա Հայաստանը բաց է թողնում իր ձեռքի ճնճղուկին, որպեսզի բռնի երկնքում ճախրող կռունկին»,- նկատում է Կարինա Գևորգյանը:
Նրա գնահատմամբ՝ 6 ամսվա ընթացքում կառավարությունը հնարավորություն ուներ հստակ որոշելու իր ռազմավարությունը՝ հենվելով կարևորագույն կետերի վրա:
Քաղաքագետի կարծիքով՝ այդ կարևորագույն կետերից մեկն արդյունաբերությանը զարկ տալն է, որի համար, ըստ նրա, հիմք կարող է հանդիսանալ «Նաիրիտ»-ի վերագործարկումը:
«Տնտեսական առումով ցանկացած կանգառ կարող է կատաստրոֆիկ ազդեցություն ունենալ Հայաստանի համար: Ասեմ ավելին՝ Թուրքիայի աջակցությամբ ԵՄ-ԵՏՄ կամուրջ հանդես գալու համար քայլեր է անում Ադրբեջանը՝ օգտվելով Ռուսաստանի և Թուրքիայի հարաբերություններից՝ Սիրիայում»,- նկատում է Կարինա Գևորգյանը՝ հավելելով, որ Ադրբեջանն իր նպատակին հասնելու համար գործադրում է բոլոր ջանքերը:
Քաղաքագետի գնահատմամբ՝ երկրներն իրենց կայունությունը պահպանում են տնտեսությամբ: Այսօր, թեև Հայաստանը զիջել է դիրքերն այս առումով, սակայն բարդ իրավիճակից պետք է դուրս գա և վերականգնի իր դիրքերը, քանի որ այլընտրանք չունի:
«Եթե չգտնեն այդ ելքը, ապա կգործի դոմինոյի էֆեկտը. անկում՝ բոլոր ուղղություններով»,-եզրափակեց քաղաքագետը:
Մասնրամասները՝ տեսանյութում