«Ես մերժում եմ քեզ, Վե՛հ»
Սելֆին այսօր Հայաստանում քաղաքական կատեգորիա է դարձել։ Այսպես, եթե դու վարչապետի հետ սելֆի ունես, ապա առնվազն փոխնախարար ես, իսկ եթե հանկարծ քայլել ես հետը՝ դա արդեն փոխվարչապետի թեմա է։
Սակայն իրավիճակը քիչ այլ է Կաթողիկոսի պարագայում։ Սուրբը սելֆի ունի առաջնորդի հետ, սուրբը նաև քայլել է նրա հետ, թռել, հասել են մինչև Նյու Յորք ու հետ եկել, բայց խռոված զույգերի պես դեռ մերժում են իրար, կարծես մեկը մեկին դեռ ապացուցելու բաներ ունի, դե, վստահության պահ կա, իրար հետ կյանք են ապրելու։
Սակայն, սելֆիներից անդին, մտահոգություններ առաջացավ, երբ Կառավարության նիստում վարչապետի պաշտոնակատար Փաշինյանը, բացասական եզրակացություն տվեց «Հատուկ պետական պաշտպանության ենթակա անձանց անվտանգության ապահովման մասին» օրենքում լրացումներ կատարելու մասին նախագծին։ Օրենքով երաշխավորվելու էր Ամենայն Հայոց Կաթողիկոսի անվտանգության ապահովումը, ինչպես երաշխավորված է ԱԺ նախագահի, վարչապետի, ՀՀ նախագահի անվտանգությունը:
Փաշինյանը պնդում է՝ «Պետք չէ, այսպես ասած, տպավորություն թողնել, որ Հայաստանում Ամենայն Հայոց Կաթողիկոսի անվտանգությանն ինչ-որ բան սպառնում է: Եթե կա այդպիսի ընկալում, դա սխալ ընկալում է»: Վե՛րջ, հարցը փակված է։
Իհա՛րկե, նախագիծը բերելու հիմք կար՝ Գնդեվանքում կատարվածը, սակայն Փաշինյանն իր այս քայլով կամ սրեց հարաբերությունները Վեհի հետ, կամ էլ՝ բոլորովին հակառակը՝ «անհոգ եղեք, բան չի պատահի»։
Մնում է մտածել, որ Վեհն, ամեն դեպքում, իսկապես անվտանգության աշխատակիցների կարիք չունի, բայց մի կողմից էլ՝ հետաքրքիր կլիներ, օրինակ, աշխարհազորի հավաքագրումը։ Արդյոք Գարեգին Բ-ն նման քայլի կգնա՞ և ցույց կտա՞ իր ուժը Փաշինյանին՝ պետք է միայն ադիբուդիի տուփը վերցնել և սպասել հաջորդ սերիային։
Ինչ խոսք՝ «Ես մերժում եմ քեզ, Վե՛հ» սերիալը դեռ շարունակություն կունենա, գուցե Միհրան Հակոբյանը բարելավված նախագիծ ներկայացնի...