«Ձեռքերը մաքուր» Վանոն սպասում է Նիկոլի ձեռքին
Գրող, հրապարակախոս, ՀՀ նախկին ոստիկանապետ Վանո Սիրադեղյանը Հայաստան չի վերադառնում, քանի որ հույս է փայփայում, որ հեղափոխությունից հետո իր վրայից կհանվեն մեղադրանքները և Հայաստանի հողը կտրորի հանգիստ խղճով և վստահ հույսով, որ ճաղերի հետևում չի հայտնվի:
Սակայն, ինչպես ասում են, Վանո Սիրադեղյանը դեռ միայն հույս ունի, քանի որ ո՛չ նոր իշխանության ներկայացուցիչների, ո՛չ այդ իշխանության ղեկավարի կողմից չի եղել որևէ արտահայտություն, որը գուցե Վանո Սիրադեղյանի համար ճանապարհ բացեր դեպի Հայաստան:
Այսօր Ազգային ժողովում «Ծառուկյան» խմբակցության պատգամավոր Արարատ Զուրաբյանը վարչապետի պաշտոնակատարին ասաց, որ արդեն հինգ ամիս է՝ նրա հարևանությամբ ապրում է Սերժ Սարգսյանը, բայց իր ընկեր Վանոն Հայաստանում չէ՝ ակնարկելով Փաշինյանից լսել դիրքորոշում Վանո Սիրադեղյանի վերաբերյալ: Բայց արի ու տես՝ ինչպես ամեն տեղ, այստեղ ևս՝ Նիկոլը կարողացավ «սղղացնել» այն պատասխանը, որն ամենաքիչը կհետաքրքրեր հարց ուղղողին՝ խնդրի լուծումը բարդելով իրավաբանության վրա:
Նույն պատասխանը նա տվեց նաև լրագրողների հետ ճեպազրույցում:
«Դա իրավական խնդիր է և իրավաբանորեն պետք է լուծվի: Որպես մի մարդ, որ եղել եմ ընդհատակում, եղել եմ բանտում, կարող եմ ասել, որ բանտում գտնվելու վիճակն ավելի կոմֆորտ է, քան ընդհատակում»,- ասաց նա:
Այսպիսով, Նիկոլ Փաշինյանն իր պատասխանատվության տիրույթից դուրս դրեց Վանոյի հարցը, որը վերջին շրջանում հաճախակի է հայտնվում մամուլի էջերին:
Այլ հարց է, թե ինչո՞ւ, որքանո՞վ ձեռք չի տալիս Վանոյի ներկայությունը Հայաստանում և ինչ վտանգ է զգում Նիկոլը:
Հենց այս առկախված հարցն է գալիս ապացուցելու, որ վտանգ ու վախ, այնուամենայնիվ, Նիկոլն ունի՝ հաշվի առնելով Վանոյի տեսակն ու վերջին շրջանում ակտիվացած խոսակցությունները, որ այս իրավիճակում երկրին նաև Վանոն է պետք:
Թե Լևոն Տեր-Պետրոսյանի թիմակից Վանո Սիրադեղյանը Հայաստանում հայտնվելուց հետո որ բևեռում կհայտնվի՝ բնականաբար, հուզում է Լևոն Տեր-Պետրոսյանի՝ արդեն նախկին թիմակից Նիկոլին, ով գուցե չհանդգնի «ձեռքերը մաքուր» 18 տարի հետախուզման մեջ գտնվողին ձեռք մեկնել: Իսկ թե ինչու, պետք է հարցնել և պատասխան պահանջել հենց Փաշինյանից: