20 օր առաջ Գերմանիայում մահացել է հայ կինոռեժիսոր Դոն Ասկարյանը. Մշակույթի նախարարն ու իր կառույցը դեռ չգիտեն այդ մասին
Հոկտեմբերի 6-ին Գերմանիայի մայրաքաղաք Բեռլինում մահացել է հայազգի կինոռեժիսոր, լուսանկարիչ Դոն Ասկարյանը։ Միգուցե կինոռեժիսորի անուն ազգանունը ոչինչ չասի շատերին, սակայն բավական է թերթել այս մարդու կենսագրությունը, մրցանակներն, ու պարզ կդառնա, որ մոտ 20 օր առաջ մենք կորցրել ենք 21-րդ դարի հայ ամենաանվանի կինոռեժիսորներից մեկին։
Ասկարյանը եղել է Տարկովսկու աշակերտը։ Սովորել է Մոսկվայում։ Արցախում ծնված Ասկարյանը, ով արդեն մի քանի տարի հաստատվել էր Մոսկվայում, 1977 թվականին չի ցանկացել ծառայել Խորհրդային բանակում, այդ իսկ պատճառով աքսորվել է Սիբիր, իսկ մեկ տարի անց էլ նրան դուրս են հանել ԽՍՀՄ-ի սահմաններից։ Արդյունքում կինոռեժիսորը հաստատվել է Գերմանիայում, որտեղ էլ այս ամսվա սկզբին իր մահկանացուն կնքեց նա։
Վենետիկի կինոփառատոնի մասին բոլորը գիտեն։ Այս կինոփառատոնը համարվում է աշխարհի հնագույն ու ամենահեղինակավոր փառատոններից մեկը։ Ասկարյանմ ունի հրաշալի մի քանի կինոնկարներ, որոնք արժանացել են գերմանական, եվրոպական հեղինակավոր մրցանակների։ Սակայն նրա գլուխգործոցը համարվում է 1998 թվականին նկարահանված «Կոմիտաս» ֆիլմը։ Նույն թվականին Վենետիկի կինոփառատոնի ժամանակ ֆիլմն արժանացել է 6 մեդալների։ Սա ֆանտաստիկ ձեռքբերում է հայ կինեմատոգրաֆիայի ու մշակույթի ոլորտում։ Պետք է ընդգծենք նաև, որ նույն 1998 թվականին նկարահանված «Լեռնային Ղարաբաղ» ֆիլմը ցուցադրվել է գերմանական ամենահեղինակավոր հեռուստաընկերություններում։
Կարելի է շատ երկար գրել, խոսել Ասկարյանի մասին, սակայն․․․ մեր երկիրն ունի Մշակույթի նախարարություն, որտեղ գոնե կարող էին գրել, ցավակցական հեռագիր հղել Ասկարյանի մահվան կապակցությամբ։ «Մշակույթը Լիլիթ Մակունցն է», սակայն նա ու նրա ղեկավարած կառույցը միանշանակ չգիտի ո՛չ միայն Ասկարյանի մասին, այլև այն մասին, որ այս մեծ հայը մահացել է արդեն մեկ ամիս։ Երբ որոշ ժամանակ առաջ մահացավ Գուրգեն Մահարու կինը՝ Անտոնինա Մահարին, Մշակույթի նախարարությունում իմացան միայն հուղարկավորության օրը։ Շատերը մտածում էին, որ միգուցե ուշադրություն կդարձնեն ապագայում, սակայն․․․
Սակայն արդյունքում հեռավոր Գերմանիայում կյանքից հեռացավ մեծ հայը՝ Դոն Ասկարյանը, ով ծառայեց ու բարձր պահեց իր հայրենիքի պատիվը։ Փոխարենը հայրենիքը մոռացավ, զլացավ կամ էլ չցանկացավ ասել․ «Հոգուդ հանգստություն, Դոն Ասկարյան»։
NEWSPRESS.am