Նիկո՛լ, եթե սիրեիր Երևանը՝ այստեղ կլինեիր, ոչ թե լիբանանցու հետ սելֆի կանեիր
Քայլում ես Երևանում ու հասկանում՝ չկա՛ մեր սիրելի քաղաքի նկատմամբ սրտացավություն, չկա՛ սեր ու ավելի լավը դարձնելու ձգտում։ Տարոն Մարգարյանի թիմը անճաշակ զարդարանքի համար մեղադրում է նոր քաղաքապետին, նոր քաղաքապետի թիմն էլ՝ հներին։ Եվ այստեղ է, որ հասկանում ես՝ նրանց բախումից տուժում է մեր քաղաքը, մեր քաղաքացին, որն այդպես էլ այսօր կազմակերպված և տոնական տրամադրություն ապահովող օր չի ունենում։
Այնուհետև, հույսդ կտրած, մի կողմ ես դնում քաղաքային իշխանություններին և փորձում հասկանալ՝ ինչպե՞ս շնորհավորեց վարչապետը մայրաքաղաքի 2800-ամյակը, ինչպիսի՞ ջերմությամբ, ինչպիսի՞ խոստումներով կամ ինչպիսի՞ն է նրա պատկերացումը՝ իր կողմից ստեղծված նոր իրավիճակում։
Ցավալի է, բայց Նիկոլ Փաշինյանը մի հին տեսանյութով էր շնորհավորել երևանցիներին, որն օգտագործել էին նախորդ ընտրություններում՝ «Ելք» դաշինքի նախընտրական քարոզարշավի ժամանակ և ընդամենը մի տող գրել՝ «Շնորհավոր տոնդ, Երեւա՛ն: Սիրում եմ քեզ»։ Չգիտեմ դուք ինչպես, բայց ես այս շնորհավորանքում սեր ու ջերմություն չնկատեցի, հերթական գրառումն էր կարծես՝ սանասարյանական ոճոով. մեկ էլ նա է իր յուրաքանչյուր գրառումից հետո գրում, որ սիրում է մեզ։
Այսպիսի՞ն է Նիկոլի սերը մայրաքաղաքի նկատմամբ, սերը միայն խոսքերո՞վ է լինում: եթե սիրում ես՝ ո՞ւր ես քո քաղաքի տոնի ժամանակ. հերթական շրջագայությա՞ն, դե իհարկե՝ Լիբանանի վարչապետի հետ սելֆի ես անում և ուրախ ժպտում, դե ինչո՞ւ չէիր անի՝ ունես այդ պաշտոնը զբաղեցնելու և սելֆիներ անելու լուրջ աջակացություն։
NEWSPRESS.am-ի հիմնադիր՝
Արմենուհի (Արիանա) Հովսեփյան