Մանկավարժական համալսարանի դասախոսը սպառնում է և վիրավորում ուսանողներին. ռեկտորը տեղյակ է, բայց լուռ
Խաչատուր Աբովյանի անվան հայկական պետական համալսարանի բանասիրական ֆակուլտետի ուսանողները պահանջում են հայոց լեզվի դասախոս, դոցենտ Սուսաննա Ղարիբյանի հեռացումը։
Ուսանողներն ահազանգել են NEWSPRESS.am-ի խմբագրություն. նրանք հայտնում են, որ Սուսաննա Ղարիբյանը ո՛չ միայն չի տիրապետում իր առարկային, այլև չունի մանկավարժի մոտեցում:
Մեր զրուցակիցներն անհանգստացած պատմում են, որ այս տարվա սեպտեմբերից, հենց առաջին իսկ դասից հետո, իրենց համար պարզ դարձավ, որ դասախոսը, մեղմ ասած, գրագետ չի մոտենում իր առարկային: Նրանք այդ մասին հայտնել են համալսարանի ղեկավարությանը և խնդրել՝ փոխել դասախոսին: Սակայն ուսանողների խնդրանքը մնացել է անհաղորդ: Դրան հետևել է Սուսաննա Ղարիբյանի ագրեսիվ պահվածքը: Նա պատեհ-անպատեհ վիրավորել է ուսանողներին, անգամ նրանց նկատմամբ բռնություն է կիրառել՝ փակել է լսարանում, քաշել աղջիկներից երկուսի շորերից:
Ուսանողներն անկեղծ անհանգստացած ու մտահոգված էին այն աստիճան, որ չէին ցանկանում իրենց անունները հրապարակվեն: Հատկապես այն բանից հետո, երբ Սուսաննա Ղարիբյանը սպառնացել է ուսանողներին, թե՝ առջևում քննություններ են և հանդես է եկել ագրեսիվ դրսևորումներով, ուսանողները ստորագրահավաք են կազմակերպել: Նրանք խնդրով դիմել են համալսարանի ռեկտոր Ռուբեն Միրզախանյանին:
(Հրապարակում ենք դիմումի տեքստը. առկա է նաև 52 ուսանողի ստորագրություն, որը NEWSPRESS.am-ը կհրապարակի անհրաժեշտության դեպքում)։
Ուսանողները նկատում են, որ իրենց համալսարանում ապահով չեն զգում, քանի որ իրենց դիմում-բողոքը մնացել է անպատասխան: Ռեկտորը նրանց բանավոր պատասխանել է, թե՝ համբերեք, երկու ամիս մնաց:
Չենք քննարկում այն, որ վախի մթնոլորտում ու լարված վիճակում անհնար է սպասելը, թեկուզ և մի քանի րոպե, իսկ ուսանողների պարագայում, ովքեր պետք է քննություն հանձնեն, գնահատականներ ստանան, և այդ ամենն առանց համապատասխան գիտելիք ստանալու, պարզապես անհնար է:
Այստեղ հարց է առաջանում նաև, թե ինչու ռեկտոր Միրզախանյանը պարզապես իր համալսարանից չի վռնդում դասախոսին, ով իր պահվածքով ու բացասական դրսևորումներով գցում է համալսարանի վարկանիշը: Հատկապես երբ նրանից դժգոհում են ո՛չ միայն թղթի վրա իրենց ստորագրությունը թողած 52 ուսանողը, այլև բոլոր նրանք, ովքեր առիթ են ունեցել սովորելու Սուսաննա Ղարիբյանի դասավանդած կուրսերում:
Հարկ է նկատել, որ NEWSPRESS.am-ի տեղեկություններով՝ Սուսաննա Ղարիբյանի համար միջնորդել է ֆակուլտետի նախկին դեկան Յուրի Դավթյանը, ում անունը կապված է 2016 թվականին ինքնասպան եղած ուսանողուհի Ջ.Կարապետյանի մահվան հետ:
Այն ժամանակ այդպես էլ հստակ չպարզվեց՝ արդյոք իսկապես աղջկա ինքնասպանության պատճառը կապվա՞ծ էր դիպլոմ չստանալու և դասախոսի հետ, բայց Յուրի Դավթյանն ազատվեց աշխատանքից:
Ասում են, որ նա ոչ միայն միջնորդել, դեռ այսօր էլ հովանավորում է Սուսաննա Ղարիբյանին, ով ևս իր պահվածքով չի զիջում Դավթյանին: Վկա են ուսանողները, ում սպառնացել է Ղարիբյանը և ովքեր զրուցել են մեզ հետ:
Հրավիրում ենք Կրթության և գիտության նախարարության ուշադրությունը խնդրին, և եթե համալսարանն ինքն անզոր է պայքարել դասախոսի ամենաթողության դեմ, ապա NEWSPRESS.am-ը հետողական կլինի խնդրի լուծման հարցում: