Ի՞նչ է փոխվում՝ «հետևին ձեռ կտամ» ասողին փոխարինում է «ոտերդ կջարդեմ, անասուն» ասող հայրիկդ
Հայաստանում հաստատված նոր իշխանությունը, այլևս անհերքելի է` որդեգրել է հնի քաղաքականությունը. նույն սպառնալիքները, նույն՝ իրա վրա «տղա բերելը», նույն հանուն «լավ ախպոր լավ ախպորը» ընտրություն անելը:
Էջմիածին քաղաքի պարագան, թերևս, թվում էր, պետք է որ փոքր-ինչ այլ լիներ. հետհեղափոխական իշխանությունները շատ արագ չեզոքացրին Էջմիածինը բռնազավթած Գրիգորյաններին, և, կրկնում եմ, թվում էր՝ այլևս պետք է հանգիստ շունչ քաշեն: Ասել կուզեմ՝ սկսեն խոսել իրենց խնդիրներից, հարկ եղած պարագային՝ անգամ քննադատության ենթարկել Էջմիածնի քաղաքապետի ժամանակավոր պաշտոնակատարին:
Բայց կանգնեցինք կոտրած տաշտակի առաջ. նախկինում, եթե Գրիգորյանների հասցեին որևէ թթու խոսք ասելու, անգամ՝ ֆեյսբուքյան գրառման համար կարող էին և ենթարկվում էին Գրիգորյանների կամայական դատաստանին, ապա հիմա ազատ խոսքի համար, կամ Դիանային «աչքիդ վերևը ունք կա» ասելու համար, արժանանում են նրա հոր հայհոյանքներին ու «ոտքերը ջարդելու» սպառնալիքներին: Այսօր համացանցում տարածված ձայնագրությունը՝ Դիանայի հոր մասնակցությամբ, ապացույցն է այն բանի, որ Էջմիածնում խոսքն ազատություն չունի, որքան էլ ցավոտ հնչի:
Դիանան, իհարկե, հասկանում է, որ հայրը, մեղմ ասած, չափերն անցնելու ու կարելիի սահմանը հատելու պահին «բռնվել է», ու ինքը փախչելու տարածություն այլևս չունի. վարչապետի աջակցությունը վայելող թեկնածուն պարտավոր էր ներողություն խնդրել ու արդարացնել հորը, հակառակ պարագայում... առջևում ընտրություններ են: Կխնդրե՞ր Գասպարյան դուստրը հոր փոխարեն ներողություն, եթե արդեն իսկ ընտրված լիներ քաղաքապետ: Դժվար թե: Ինչպես Կարգին Հայկոն ու մյուսներն են անում, կասեր՝ սխալ եք ընկալել, սուտ վերնագրեր եք կարդացել, տեսանյութը մինչև վերջ դիտեք...
Էջմիածնի քաղաքապետի պաշտոնում մեկ տասնյակից ավելի թեկնածուների առաջադրումը խոսում է նաև այն մասին, որ շուրջ 5 ամիս պաշտոնավարած Դիանան, մեղմ ասած, չի կարողացել էջմիածնեցիների դարդին դարման լինել: Էլ ինչո՞ւ է պետք շարունակել անելը մի բան, ինչն անելն ակնհայտորեն չի ստացվում. և այդպես էլ պետք է լիներ:
Հասկանալի է, չէ՞, որ Մանվել Գրիգորյանի կալանավորումով նրա ամբողջ շրջապատը, համակիրներն ու թայֆան չհեռացան Էջմիածնից ու, իհարկե, շարունակելու են կրծելով քայքայել քաղաքը, իսկ կառավարման փորձ չունեցող կամ գրեթե չունեցող Դիանան դժվար թե կարողանա գլուխ հանել հրոսակախմբերից:
Ինչ վերաբերում է էջմիածնեցիներին, ապա նրանց համար թերևս Դիանայի միակ առավելությունն այն է, որ նրան սատարում է Նիկոլ Փաշինյանը. ուրիշ որևէ առավելություն Գասպարյանը չունի, չի կարող հպարտանալ արած գործերով: Ու նրա հպարտանալու միակ արժանիքը մնում է հայրը, ով փորձելու է հրեշացնելով իր աղջկան՝ նրան ամեն՝ թանկ ու էժան գնով պաշտոնի կարգել:
Զգո՜ւյշ, Դիանա, հրեշ աննկատ են դառնում:
Հ.Գ. Հարգելի Դիանա, վստահ եմ՝ տեղյակ եք, որ այս տողերը գրում է մի կին, ով շուրջ 2 տարի պայքարել է Մանվել Գրիգորյանի ու նրա մանր ու մեծ մանկլավիկների դեմ՝ չլինելով էջմիածնեցի: Այդ ընթացքում քանիցս հայտնվել եմ Գրիգորյանի թիրախում, ստացել անգամ կյանքիս համար վտանգ հանդիսացող սպառնալիքները, նրա «դեսպանները», իբրև բարի կամքի դրսևորում, խորհուրդ էին տալիս լքել երկիրը: Եվ դա, հարգելի Դիանա, երբ Մանվելը գեներալ Մանվել Գրիգորյան էր: Հիմա, փաստորեն, ի՞նչ է փոխվում. «hետևին ձեռ կտամ» ասողին փոխարինում է «ոտերդ կջարդեմ, անասուն» ասող հայրիկդ:
Դասականը կասեր՝ մի՛ արեք, պարզապես մի՛ արեք:
Արիանա Հովսեփյան
NEWSPRESS.am-ի հիմնադիր-տնօրեն