Կարևորը վերարտադրվելն է. Խաչատուրովի հերն էլ անիծած
Արդեն ամիսներ շարունակ հայաստանյան դիվանագիտության մեջ շրջանառվում է «հայկական դիվանագիտության խայտառակ տապալում» ձևակերպումը, որը վերաբերում է ՀԱՊԿ-ում հայաստանցի գլխավոր քարտուղար Յուրի Խաչատուրովի շուրջ կատարվածին, կամ որ ավելի ճիշտ է ասել՝ Խաչատուրովի նկատմամբ քրեական գործ հարուցելով՝ մեր երկրի իրավաբանական անգրագիտության աստիճանին:
Խաչատուրովի թեման մերթընդմերթ քննարկվում է հայկական ԶԼՄ-ներում և այսօր դրա առիթը տվեց ՀՀ արտաքին գործերի նախարար Զոհրաբ Մնացականյանը:
Կառավարության նիստի ավարտից հետո լրագրողների հետ զրույցում անդրադառնալով Խաչատուրովին վերաբերող հարցին, նախարարն ասել է.
«Շարունակում ենք քննարկումները, կոնսուլտացիաներն այն առումով, որ մեզ անհրաժեշտ է հարցը դիտարկել ավելի լայն կոնտեքստում, որովհետեւ նման վիճակները կարող են ի հայտ գալ տարբեր պատճառներով, և հետագայում Կազմակերպության կանոնակարգերը պետք է պատրաստ լինեն նման իրավիճակների»:
Ըստ Մնացականյանի դիվանագիտական պատասխանի՝ քննարկվում է Խաչատուրովին փոխարինելու հարցը, որից հետո, բնականաբար, մեր իրավապահների ձեռքերն ավելի անկաշկանդ կլինեն բարձրաստիճան պաշտոնյային առաջադրվող մեղադրանքների առումով. օբյեկտիվորեն, քանի դեռ Խաչատուրովը ՀԱՊԿ գլխավոր քարտուղարն է, դա զրկում է մեր իրավապահներին անկաշկանդ աշխատելուց:
Բայց խնդիրն այստեղ այն է, որ Հայաստանի գլխավոր քարտուղարության ժամկետը ավարտվում է 2020 թվականին: Երևանը հայտարարել է, որ մտադիր է պահպանել իր այդ իրավունքի ժամկետի ավարտը: Ստեղծված իրավիճակում՝ եթե մենք գլխավոր քարտուղարության ժամկետը պահպանում ենք մինչև 2020 թվականը, էլ ի՞նչ փոխարինող գլխավոր քարտուղարի մասին ենք խոսում:
Արդյո՞ք սա հերթական PR ժետսը չէ՝ թե տեսեք՝ նոր Կառավարության անկոտրում պայքարը հասավ մինչև ՀԱՊԿ, և Նիկոլի թուրը նաև դուխով ՀՀ-ից դուրս է կտրում:
Խաչատուրովի ձերբակալությունից և գրավով ազատ արձակվելուց հետո ամիսներ են անցել, սակայն մինչ այս պահը հայտնի չէ նրան փոխարինողի անունը, և ավելին, գնալով Խաչատուրովի թեման կորցնում է իր արդիականությունը՝ ըստ էության, նրա հետ կատարվածը դարձնելով ընդամենը մասկի-շոու, ինչին լավագույնս տիրապետում է թե՛ Նիկոլը, թե՛ ԱԱԾ-ն ու ՀՔԾ-ն:
Հաշվի առնելով, որ այս փուլում Նիկոլի համար կենաց-մահու խնդիրը իր և իր թիմի վերարտադրությունն է, կարելի է եզրակացնել, որ Խաչատուրովի հերն է անիծած. նրանով զբաղվելու ժամանակ՝ պարզապես չկա:
Հարց է առաջանում՝ եթե չէիք զբաղվելու, ինչո՞ւ լեզու դրեցիք ՀԱՊԿ անդամ որոշ պետությունների առաջնորդների բերանը…