Նուբարաշենից՝ Փարիզ. Հայկ Մարությանի երթուղին հակասական է
Ընտրություններում 81,06 % խփած քաղաքապետ Հայկ Մարությանը հետաքրքիր է սկսել քաղաքագլխի իր պարտականությունները կատարել: Մեկ Նուբարաշենի աղբանոցում է, մեկ էլ տեսար՝ Փարիզում: Երևի Նուբարաշեն գնալուց հետո փոշի էր նստել վրան և այն պետք էր մաքրել ինչ-որ շրջագայությամբ:
Առհասարակ, նոր իշխանությունները՝ սկսած փոխվարչապետերից մինչև խոսնակներ, անընդհատ ինչ-որ շրջագայությունների մեջ են՝ էլ չհաշված, թե քանի հոգով ԱՄՆ գնացին փոխվարչապետ Տիգրան Ավինյանի գլխավորած պատվիրակությամբ և թե ինչպես ձեռնունայն այնտեղից վերադարձան կամ երբ Մշակույթի և Առողջապահության նախարարներն ԱՄՆ սպորտ-բարերում ժամանակ էին անցկացնում՝ էլի այդ պաշտոնական հանդիպումների համատեքստում:
Դատարկ շրջագայությունների միակ ձեռքբերումն այն է լինում, որ մեր տեղական իշխանիկները կարողանում են աշխարհ տեսնել, զարգանալ, և դե, մի քիչ էլ հանգստանալ հեղափոխական էյֆորիայից:
Շրջագայությունների սիրահար պաշտոնյաների ցուցակը, փաստորեն, լրացրեց նորընծա քաղաքապետ Հայկ Մարությանը, ով մեկ շաբաթ էլ չկա, ինչ պաշտոնապես զբաղեցնում է այդ պաշտոնը, բայց արդեն հասցրել է Փարիզի քաղաքապետ Անն Իդալգոյի հրավերն ընդունել և հոկտեմբերի 16-ից 17-ը գործուղվել Փարիզ:
Ի դեպ, գործուղման հետ կապված բոլոր ծախսերը կատարվում են Երևանի 2018 թվականի բյուջեի միջոցների հաշվին, բացառությամբ գիշերավարձի, որը հոգում է հրավիրող կողմը:
Պնդումներ կլինեն, թե նախորդների պայմանավորվածություն է և նորերը պարզապես չեն խախտում այդ պայմանավորվածությունները, բայց պետք է նկատել, որ հեղափոխական մթնոլորտում նախորդների հետ այրում են կամուրջները, բացի այն կետերից, որոնք հենց իրենց է ձեռք տալիս, դե օրինակ, շրջագայությունները և այլ ճոխություններ՝ կապված ծառայողական մեքենաների, թիկնազորի կամ լեփ լեցուն ֆուրշետների հետ: