Նախորդ իշխանությունները ոչ թե պետք է անհետանան քաղաքական բեմից, այլ տրանսֆորմացվեն դաշտում. Աշոտյան
Վարչապետի թեկնածու առաջադրելու սյուժեն պետք է սպառված համարել: ՀՀԿ-ի բոլորը հայտարարությունները միշտ տեղին են եղել, և մենք տեր ենք մեր հայտարարություններին։ Այդ մասին լրագրողների հետ զրույցում ասաց Հանրապետական խմբակցության պատգամավոր Արմեն Աշոտյանը։
Թեև Հանրապետական կուսակցության անդամներից շատերը հակված են այն մտքին, որ ԱԺ արտահերթի այս փուլը պետք է բաց թողնել, սակայն կան նաև հակառակ կարծիքներ։ Այդ է պատճառը, որ ՀՀԿ-ականները դեռևս հստակ չեն հայտնում իրենց դիրքորոշումը։
«ՀՀԿ-ն դեռ որոշում չունի, այս փուլում ընթանում են վերլուծական աշխատանքներ, մոնիթորինգ և այլն, երբ ընտրությունները կնշանակվեն, մեր որոշումը կհրապարակենք»,-ասաց նա:
Ամեն դեպքում, Աշոտյանի խոսքով, ՀՀԿ-ն և՛ ասելիք, և՛ անելիք ունի ՀՀ քաղաքական կյանքում:
«ՀՀԿ-ն այն բացառիկ կուսակցություններից է, որն ունի գաղափարական հիմք, այլ հարց է, թե մեզ ինչքանով է հաջողվել վերջին տարիների ընթացքում այդ գաղափարական ակունքները զուլալ պահել, բյուրեղ պահել»,- ասաց նա՝ հավելելով, որ քաղաքական մշակույթը պահանջում է, որ նախորդ իշխանությունները չանհետանան քաղաքական բեմից։
«Քաղաքական շահերը պահանջում են, որ նախորդները ոչ թե վերանան քաղաքական դաշտից, այլ տրանսֆորմացվեն՝ իրենց տեղը վերահաստատելով քաղաքական երկնակամարում՝ լինելով գիտելիքի, կապի, փորձի կրող և օգտակար: Ամեն անգամ, երբ քաղաքական ցիկլերը սկսում են, ինչպես վարչապետը կասեր, արմատախիլ անել նախորդներին, երբեք չենք ունենա կայացած քաղաքական համակարգ: Սա իմ հիմնավորումների մեջ ամենապետականամետն է»,- ընդգծեց Աշոտյանը։