Երբ ոտաբոբիկին չի փրկում գուլպան, անգամ՝ եռագույն
Վաղը դերասան Հայկ Մարությանի համար պատմական օր է լինելու՝ նա ստանձնելու է Երևանի քաղաքապետությունը՝ հանդիսավոր երդում տալով ծառայել Երևանին և երևանցուն: Նշում ենք՝ պատմական օր է լինելու Մարությանի, բայց ոչ երևանցիների համար, քանի որ քաղաքապետության բարիքները քաղելու է ոչ թե երևանցին, այլ նույն Մարությանը, ով կախարդական փայտիկով ասես կամ չգիտես ոնց՝ դարձավ քաղաքապետ:
Բայց արի ու տես, որ Մարության դերասանից քաղաքապետ կերտել այդպես էլ չի ստացվում:
Նախ, նրա փոխարեն մի ամբողջ քարոզարշավ անցկացրեց վարչապետ Փաշինյանը. նրա փոխարեն քարոզարշավի ընթացքում խոսեց, պաթետիկ ելույթներ ունեցավ՝ փողոցում պահելով հավաքված բազմությանը:
Բայց չէ՞ որ, Հա՛յկ, սիրուն չի, հո Փաշինյանը քո փոխարեն հարցազրույցներ է՞լ չի տալու, ի վերջո՝ կարելի է չէ՞ մի փոքր հմտանալ, ջանք թափել ոչ թե էկրանին ծամածռություններ անելու, այլ սերտելու քաղաքագիտության և դիվանագիտության դասականներին՝ թույլ չտալու համար խայտառակ սխալներ, որոնցից այդպես էլ չես կարողանում ազատվել:
Մարությանի քաղաքական ոտաբոբիկությունն ապացուցելու համար բերենք նրա կողմից բարձրաձայնված մի ցցուն գաղափար. Երևանի ավագանու անդրանիկ նիստի ավարտից հետո, Մարությանը, խոսելով երևանյան խնդիրներից՝ բնակֆոնդի խնդրի մասին, նշել է, որ սովետական ժամանակաշրջանում կառուցված շենքերը պետք է քանդել, տեղը նորերը կառուցել.
«Այս առումով ոչ թե ծրագրեր ունենք, այլ անելիքներ ունենք, որովհետև, այո՛, ճիշտ եք ասում, այն շենքերը, որոնք կառուցվել են Սովետական միության ժամանակ, կոնկրետ տարիներ ունեն, որը պետք է ծառայեն, այնուհետև պետք է փոխվեն, այսինքն՝ քանդվեն, իրենց տեղը պետք է կառուցվեն նորերը»,- նշել է Մարությանը, որին լսելուց հետո չես կարողանում չարձագանքել՝ «Տո, ա՛յ տղա, դու քեզ լսո՞ւմ ես»:
Նման ԲԱՑԱՌԻԿ գաղափար դաշտ նետելուց առաջ գոնե մտովի պատկերացրե՞լ ես, թե դա ինչպես ես կատարելու, դու դեռ մի քար չես դրել քարի վրա, արդեն եկել, խոսում ես ուրիշի կառուցածը քանդելու մասի՞ն:
Թե՞ Հյուսիսային պողոտայում ծվարելուց հետո սովետական ժամանակաշրջանի ցանկացած բան քեզ համար հնոտի է թվում:
Քանդելու մասին խոսիր գոնե մեկ բան կառուցելուց հետո, իսկ մինչ այդ՝ երևանցիներս հստակ արձանագրում ենք մեկ բան՝ քաղաքական ոտաբոբիկին չի փրկի և ոչ մի գուլպա, անգամ այն եռագույնները, որոնք այսօր նվեր ստացան ՀՀ վարչապետն ու Կանադայի վարչապետը:
Արիանա Հովսեփյան
NEWSPRESS.am-ի հիմնադիր-տնօրեն