Մարությանի համար զավեշտ է, որ տրանսպորտի գինը դեռ չի բարձրացել. Կարգին Հայկոն վերածվել է քաղաքապետի
Երևանի ավագանու դեռ առաջին նիստի ժամանակ նորընտիր քաղաքապետ Հայկ Մարությանը մի քանի հայտարարություն արեց, որոնք լայն քննադատությունների առիթ դարձան:
Այդ օրը նա հայտարարեց նաև, որ Երևանի ցանկացած խնդրի լուծում տրվելու է միայն երևանցիների հանրաքվեով: Թվում էր՝ ասաց, անցավ, գնաց, բայց արի ու տես, որ չգնաց...
Այսօր՝ հոկտեմբերի 13-ին, իր երդմնակալությունից հետո, Հայկ Մարությանը լրագրողների հետ զրույցում անդրադարձել է տրանսպորտի սակագնին:
Նա հայտարարել է, թե երբ տրանսպորտը փոխվի՝ կխոսեն նաև տրանսպորտի գնից, բայց ամեն դեպքում, այդ գինը որոշվելու է հանրաքվեի միջոցով: Մարությանը մասնավորապես ասել է.
«Մենք միասին ենք որոշումները կայացնելու: Ես միանձնյա չեմ որոշելու»:
Նախ հետաքրքիր է՝ այդ ինչպե՞ս է պատկերացնում այդ գնի որոշման կարգը: Հավանաբար այնպես, ինչպես մի առիթով խոստացավ վարչապետ Նիկոլ Փաշինյանը՝ հայտարարելով, որ բոլոր հարցերը լուծվելու են հրապարակում:
Այդպես երևանցիները կհավաքվեն Հանրապետության հրապարակում և կտրվի հարց՝ ովքե՞ր են համաձայն, որ տրանսպորտը դառնա, ասենք, 200 դրամ: Կամ ավելի պարտադրող հարց՝ համաձա՞յն եք, որ տրանսպորտը դառնա 200 դրամ ու ժողովուրդը բռունցքներ արած կգոչի՝ այո՜, որովհետև այդ հարցադրումն իրենց է ուղղում «ժողովրդի ընտրյալը»: Թերևս մոտավորապես այս տարբերակով կարելի է հասկանալ Մարությանի ակնարկած հանրաքվեն:
Իրականում սա նոր իշխանության հերթական պոպուլիստական հայտարարությունն է, որն այս անգամ հնչում է նորընտիր քաղաքապետի շուրթերից:
Այս հարցում, ժողովրդի կարծիքն իմանալու համար, հանրաքվե հարկավոր չէ. ով՝ ով, բայց գոնե Հայկ Մարությանը շատ լավ գիտի, որ երևանցիներն իրականում դեմ են տրանսպորտի սակագնի բարձրացմանը: Նա ինքն առիթ է ունեցել 2013 թվականին մասնակցել սակագնի թանկացման դեմ կազմակերպված բողոքի ակցիաներին:
Բայց եթե այն ժամանակ որպես շարքային քաղաքացի պայքարում էր, ապա հիմա իրավիճակ է փոխվել՝ նա պետք է կարողանա իր պոպուլիստական հայտարարություններով համոզել երևանցիներին, որ տրանսպորտի սակագին բարձրացնելը պարզապես անհրաժեշտություն է: Համենայնդեպս թանկացման դեմ նախկինում պայքարող Կարգին Հայկոն այսօր ծիծաղելի ու սխալ է համարում, որ դեռ տրանսպորտի գինը չի բարձրացել: Նա այդ մասին լրագրողների հետ զրույցում հենց այդպես էլ ասել է.
«... շատ զավեշտալի է, որ 2013 թվականից հետո 5 տարվա ընթացքում ամենի ինչի գինը բարձացել է, բացի տրանսպորտի գնից: Այն ժամանակ օբյեկտիվ էր, որ ասում էինք՝ մի թանկացրեք, այս անգամ, որ չի թանկանում, օբյեկտիվ չի»:
Ավելին՝ Մարությանն ասել է, թե նախկին իշխանությունները միգուցե վախենում էին գինը բարձրացնել, որ բողոք չլինի:
Ըստ քաղաքապետի խոսքերի՝ սա արդեն նշանակում է, որ նախկին իշխանությունը, փաստորեն, այնուամենայնիվ, ժողովրդի կարծիքի հետ հաշվի էր նստում, վախենում էր, իսկ նոր իշխանության համար ժողովրդի դժգոհությունը չի կարող արգելք լինել, և սակագինը կավելանա, քանի որ այդպես է հարկավոր, սակագինը կավելանա, քանի որ իրենք ժողովրդից չեն վախենում, սակագինը կավելանա, որովհետև, ինչպես Մարությանը կասեր՝ «իրենց դեմ խաղ չկա...»:
Արմինե Մկրտումյան