Կոնդի արվեստանոց, մոլոկաններ ու անտուն մարդիկ․ մի քանդվող պատմական շենքի պատմություն․ Արամի 23 (լուսանկարներ)
Արամի փողոցում տեղի ունեցող շինարարության հետևանքով քանդվում է Արամի 23 հասցեում գտնվող «Հայաստանի փոքրիկ երգիչներ» մանկական ֆիլհարմոնիայի շենքը։ Շենքի պատերը ճաքում են, հատակը նստում է ու կա վտանգ, որ շինությունը կփլվի։ Իրականում, այս շենքի մասին տեղեկությունները քիչ են, սակայն մի պահ եթե անտեսենք այդ տեղեկությունները, մեր աչքի առաջ հայտնվում է մի փոքրիկ ու գեղեցիկ շենք, որը Հին Երևանի վերջին պատառիկներից է։
Շենքում դեռ պահպանվում են հին դռները, պատուհանի փեղկերն ու բուխարիները։ Սակայն այս շենքի «կենդանությունը» կախված է միայն ժամանակից։ Ճաքերն ավելանում են, եղած ճաքերը՝ ավելի լայնանում։
NEWSPRESS.am-ի հետ զրույցում «Հայաստանի փոքրիկ երգիչներ» ասոցիացիայի նախագահ ու գեղարվեստական ղեկավար Տիգրան Հեքեքյանը պատմեց այն պատմական տեղեկությունների մասին, որ իրենք գիտեն շենքի մասին։
«Ուսումնասիրելով պարզել ենք, որ 1890-ականներին հողի հարկ են վճարել այս շենքի համար։ Այս փաստից հասկանում ենք, որ այս շենքը այդ ժամանակ գոյություն ուներ։ Հարկ վճարողն ու շենքի տերը եղել է բժիշկ։ Խորհրդային տարիներին շենքը եղել է Կոնդի արվեստանոցը։ Սովետական միության քանդվելուց հետո այս շենքում անօրինական հիմունքներով ապրել է 3 մարդ։ Հետո մենք գնեցինք այս շենքը, վերանորոգեցինք ու 2007 թվականից պատկանում է մեզ»,-ասաց Տիգրան Հեքեքյանը։
Տարածքում բնակվողներն էլ հիշեցին, որ ժամանակին այստեղ մոլոկաններն են ապրել, որոնց եփած թեյի հոտը տարածվում էր ամբողջ Արամի փողղոցում։
Այս շենքում է նկարահանվել «Արտիստը» ֆիլմը։