Ո՛չ կատաղի ընդդիմանալու են, ո՛չ էլ հնազանդվելու․ Երևանի ավագանու ԲՀԿ անդամները կհրաժարվեն ծառայողական մեքենաներից
Երևանի ավագանու ԲՀԿ խմբակցության կողմից մեծ աշխատանք է տարվելու առկա խնդիրներին ամենաարդյունավետ լուծումներ տալու համար: Այդ մասին հայտարարեց ԲՀԿ խմբակցության անդամ Արման Աբովյանը՝ լրագրողների հետ զրույցում։
Նա նշեց, որ Երևանն ունի շատ խնդիրներ, բայց հարկավոր է ոչ թե բյուջետային ծախսերն ավելացնել, այլ այդ ծախսերն արդյունավետ օգտագործել։
Որպես սկիզբ՝ Արման Աբովյանը հայտարարեց, որ իրենց խմբակցությունը հրաժարվում է ծառայողական մեքենաներից:
«Կոչ եմ անում մեր գործընկերներին՝ հետևել մեր օրինակին: Մարդիկ, ովքեր զբաղվելու են Երևանի տրանսպորտի խնդիրներով, լավ կլինի, որ երթևեկեն տրանսպորտով կամ հեծանիվով, մանավանդ որ դրա օրինակն ունենք, երբ բարձրաստիճան պաշտոնյաները հեծանիվով են երթևեկում»,- ընդգծեց նա:
Աբովյանը շեշտեց նաև, որ իրենց առջև դրած խնդիրները լուծելու համար չեն ընդդիմանա որոշ հարցերում, բայց և լուռ չեն հնազանդվի։
«Մեր գործառույթներն իրականացնելիս ոչ պատրաստվում ենք հնազանդվել ամեն ինչի ու հաշտվել ամեն ինչի հետ, ոչ էլ պատրաստվում ենք կատաղի ընդդիմանալ: Ամեն ինչ արվելու է հանուն Երևանի: Մեր ֆրակցիայի աշխատանքը լինելու է բաց և թափանցիկ: Կոչ եմ անում երևանցիներին մեզ հանգիստ չթողնել, բարձրաձայնել խնդիրները, նաև տալ դրանց լուծման իրենց տարբերակը»,- ասաց Աբովյանը:
Հարցին, թե իրենք ընդդիմադիր` «սև», խմբակցությո՞ւն են լինելու, Աբովյանը պատասխանեց. «Բացարձակ անընդունելի է մարդկանց կիսել սև-սպիտակի: Այդ տխրահռչակ դասակարգումը պետք է հանվի: Մենք դասական ընդդիմադիր չենք լինելու: Էլի եմ ասում` ո՛չ կատաղի ընդդիմանալու ենք, ո՛չ էլ ամեն ինչին հնազանդվելու ենք: Եթե մեր գործընկերները լավ ծրագիր ներկայացնեն, մենք չենք ընդդիմանա այդ ծրագրին»,-ընդգծեց Աբովյանը։