Երբ պետական պաշտոնյա լինել այդպես էլ չի ստացվում
Այն, որ պետություն կառավարելը մեկ մարդու գործ չէ՝ լավագույնս վերահաստատվում է վարչապետ Նիկոլ Փաշինյանի կառավարության պարագայում. Փաշինյանը և’ վարչապետ է, և’ փոխվարչապետ, և՛ ամենաստորին օղակի պաշտոնյա, քանի որ իրեն շրջապատել է բանիմացության կարոտ ջահելներով, ովքեր քայլելուց մինչև պաշտոն ձեռք գցելն ու դրանից հետոն իրարից այդպես էլ չտարանջատեցին:
Նրանք այդպես էլ չհասկացան, որ պաշտոն ստանձնելը միայն կոստյում կրելը չէ. այն քայլելուց ավելի պատասխանատու է:
Իսկ այդ պատասխանատվության տակ կառավարության ձևավորումից մի քանի ամիս անց էլ Փաշինյանի տղերքն այդպես էլ չմտան:
Հանուն արդարության պետք է ասել, որ կառավարության կազմում կան լուրջ մասնագետներ, ինչը, սակայն, Փաշինյանի հունարը չէ:
Եվ այդ մասնագետների շարքն օրերս համալրեց Արտակարգ իրավիճակների նոր նախարար Ֆելիքս Ցոլակյանը:
Այն, որ Ցոլակյանը գործից գլուխ հանողներից է, ակնհայտ փաստ է, իսկ թե ինչպես կկարողանա գլուխ հանել Փաշինյանի անտաղանդ կադրերից, կիմանանք շատ ավելի ուշ:
Ի դեպ՝ Ֆելիքս Ցոլակյանի նշանակումը մեծ ոգևորություն է պատճառել վարչապետի տղերքից մեկին՝ առաջին փոխվարչապետ Արարատ Միրզոյանին.
«Ընկերներս անդադար գրում են՝ Ֆելիքս Ցոլակյանին նշանակեք ԱԱԾ ղեկավար։
Նախ՝ մեծագույն հարգանքներս իրեն։ Մեծագույն։
Երկրորդ։ Կդիտարկենք, ժողովուրդ ջան, անպայման կդիտարկենք,-իր ֆեյսբուքյան էջում գրել էր Միրզոյանը, իսկ ավելի ուշ՝ հավելել,-
Դիտարկեցինք, բայց մեկ այլ շատ կարևոր գերատեսչության համար )))
Ողջունում եմ պրն Ցոլակյանին»։
Թե ինչի վրա է այսպես որգևորվել հարկատուների հաշվին կայացող Արարատը, դժվար է հասկանալ: Հավանաբար, հոգու խորքում ուրախացել է, որ Արտակարգ իրավիճակների նախարարութունը հանձնում են վստահելի ձեռքերի և իրենց թիմն ազատում մեկ չնախարարից:
Կամ, գուցե Արարատ Միրզոյանին որգևորել է հեռակա ակնկալիքը՝ Ֆելիքս Ցոլակյանից փորձ և հմտություն սովորելու, որի բացակայությունը առաջին փոխվարչապետի մոտ ակնհայտ է դառնում, երբ որոշում ես նյարդերդ մի կողմ դնել և հետևել, օրինակ, նրա վարած կառավարության նիստերին:
Արարատ Միրզոյանը նիստը վարում է այնպես, ինչպես այն կվարեր տարրական դասարանի մի աշակերտ:
Ի դեպ՝ ամեն զեկուցվող հարցի վերաբերյալ սեփական անիմաստ տեսակետն արտահայտելու սովորությունից, օրինակ, տարրական դասարանի աշակերտը գուցե զերծ մնար, իսկ Միրզոյանը՝ ոչ:
Տպավորությունն այնպիսին է, որ նա այդկերպ Փաշինյանին ցույց է տալիս, թե իսկապես աշխատում է:
Իսկ բացի ամերիկաներում անօրակարգ պտտվելուց, ֆեյսբուքյան գրառումներից ու մեկ-մեկ էլ մատ թափ տալուց, Միրզոյանը դեռ որևէ լուրջ գործով չի զբաղվել: