Խտրականությո՞ւն, թե՞ քաղաքական շահ. ոստիկանական պատը փակել է Բաղրամյան 26-ի և ԱԺ-ի «բաց դռները»
Երեկ՝ հոկտեմբերի 5-ին, Կարապի լճի հարակից տարածքից մեկնարկել է ակտիվիստների երթ դեպի Բաղրամյան 26՝ վարչապետի նստավայր:
«Ո՛չ ենք ասում սրբապիղծներին, ովքեր ցանկանում են թուլացնել մեր պետությունը», «Ո՛չ ԼԳԲՏ ֆորումին» գրությամբ պաստառներով՝ երթի մասնակիցները բողոքում էին Հայաստանում հասարակության այլասերվածության, ազգային արժեքների պղծման դեմ և պահանջում կառավարությունից ուշադրություն սևեռել նույնասեռականների պրոպագանդային:
Ակցիային մասնակցում էին բազմաթիվ երիտասարդներ, որոնց միացել էին մեծ թվով հոգևորականներ, հասարակական կազմակերպությունների, քաղաքացիական նախաձեռնությունների ներկայացուցիչներ:
Նրանք շարժվեցին դեպի Նիկոլ Փաշինյանի նստավայր, որպեսզի իրենց պահանջը ներկայացնեն: Ու չնայած երթը խաղաղ էր, սակայն ոստիկանական պատը կանգնեցրել է քաղաքացիներին՝ նույնիսկ դեռ դարպասներին չհասած:
Սա այն դեպքում, երբ Նիկոլ Փաշինյանն ինքն է հայտարարել, թե իր նստավայրի դարպասներն այլևս բաց են բոլորի առաջ:
Եթե հաշվի առնենք այն հանգամանքը, որ ոստիկաններն ու անվտանգության աշխատակիցները պարզապես զգուշավորություն են ցուցաբերել ու չեն ցանկացել հանրահավաքի մեծ թվով մասնկիցներին մոտ թողնել դարպասներին, ապա այդ դեպքում ինչո՞ւ Փաշինյանը բացեց Ազգային ժողովի դռները և ներս թողեց իր կազմակերպած հանրահավաքի՝ կրկնակի թվով մասնակիցներին: Թե՞ դա այն դեպքն էր, երբ հանրահավաքը հենց ինքն էր կազմակերպել ու այն իր իսկ քաղաքական շահերից էր բխում, իսկ այս դեպքում, փաստորեն, քաղաքացիները Փաշինյանի առաջ խնդիր են դնում՝ պահանջելով ո՛չ ասել ԼԳԲՏ ֆորումին և պայքարել նույնասեռականների դեմ: Սա երևի թե վարչապետի ծրագրերի մեջ չի մտնում, ու երևի թե նա այնքան էլ դեմ չէ նույնասեռականներին, քանի որ դա չի նպաստի իր իշխանության ամրապնդմանը:
Ամեն դեպքում, եթե Բաղրամյան 26-ն, այնուամենայնիվ, փակում է ոստիկանական պատը, ապա ստացվում է՝ Փաշինյանի հայտարարությունը, թե «Բաղրամյան 26-ի դռները բոլորի համար բաց են», պարզապես փուչիկ է: Հակառակ դեպքում, նա խտրականություն չէր դնի քաղաքացիների ու նրանց կողմից բարձրացրած հարցերի միջև՝ իր դեպքում բացելով, իսկ մյուսների դեպքում՝ փակելով դարպասները: