Կառավարությունը նոր պարտք կվերցնի, բայց նպաստ, թոշակ ու աշխատավարձ չի բարձրացնի
ՀՀ ֆինանսների նախարար Ատոմ Ջանջուղազյանը հայտարարում է, որ եկող տարվա պետբյուջեում աշխատավարձերի, նպաստներ ու թոշակների բարձրացում չի նախատեսվում։
Նա լրագրողների հետ հանդիպման ժամանակ ասել է, որ եթե մարդիկ ուզում են բարձրանան գումարները, ապա պետությունը ստիպված կլինի պարտք վերցնել։ Հետևաբար, եթե աշխատավարձի կամ նպաստի չհիմնավորված բարձրացում տեղի ունենա, ապա աղքատությունն ավելի կխորանա։ Մյուս կողմից էլ՝ նախարարը նկատել է, թե նպաստ ստանալու փոխարեն՝ ավելի լավ է աշխատել։
«Արդյո՞ք մեր նպատակն է, որ առողջ, աշխատունակ մարդը նպաստ ստանա, արդյո՞ք մեր նպատակադրումը չպետք է լինի, որ առողջ, աշխատունակ մարդը մոտիվացիա ունենա աշխատելու, ոչ թե հակախթան ունենա, իր ունեցած-չունեցածից ազատվի, որ նպաստառուների ցուցակում իր տեղը պահպանի»,- հայտարարեց Ջանջուղազյանը:
Թեև նախարարը վստահեցնում է, որ չեն ուզում պարտք վերցնել՝ աշխատավարձ ու նպաստ բարձրացնելու համար, սակայն այնպես չէ, որ պետությունն ընդհանրապես պարտք չի վերցնելու։
«Այո, պարտք ենք վերցնելու․․․ եթե պետությունը պարտքը վերցնում է նոր ակտիվ ստեղծելու համար, որը նոր եկամուտներ է բերելու, հավանական է, որ կվերցնեք»,- ասում է Ջանջուղազյանը։