14 թեկնածու Էջմիածնի քաղաքապետի համար. պայքարում է նաև «չոփը չոփի վրա չդրած» «կոկետկա» Դիանա Գասպարյանը
Հոկտեմբերի 21-ին Հանրապետության 25 համայնքում տեղի կունենան արտահերթ ընտրություններ. քաղաքական առումով դրանցից ամենահետաքրքիրները թերևս Էջմիածնի, Արմավիրի, Հրազդանի և Կապանի համայնքապետերի ընտրություններն են:
Այս ընտրություններում շատերի ուշադրությունը հայտնի պատճառներով սևեռվել է հատկապես Էջմիածին քաղաքի վրա:
NEWSPRESS.am-ը ԿԸՀ կայքից տեղեկացավ, որ առաջադրվել է14 թեկնածու՝ անկեղծ ասած՝ մեկը մեկից անհայտ մարդիկ: Այդ թվում՝ ՔՊ-ից առաջադրվել է նաև քաղաքապետի ժամանակավոր պաշտոնակատար Դիանա Գասպարյանը, ով հենց այդ աթոռը զբաղեցնելու համար էլ անդամագրվեց իշխող կուսակցությանը:
Թեև նշանակման սկզբնական շրջանում Դիանա Գասպարյանն ասում էր, որ ինքը եկել է նոր իրողությունների պայմաններում փոփոխությունները հասցնելու Էջմիածին և աթոռն իրեն չի հետաքրքրում, սակայն նրա մտքերում ինչ-որ բան փոխվել է:
Քաղաքում «չոփը չոփի վրա չդրած» ժամանակավոր պաշտոնակատարն այժմ ցանկանում է քաղաքապետ ընտրվել՝ այն դեպքում, երբ իրեն տրված ժամանակահատվածում չի կարողացել ոչնչով աչքի ընկնել, անգամ մի բացահայտում չի կատարել՝ դա էլ այն դեպքում, երբ իրենից առաջ այդ պաշտոնին է եղել քաղաքն ալան-թալան արած Գրիգորյաններից մեկը:
Զարմանալի է՝ իսկապե՞ս չկար ոչ մի բացահայտման հիմք, թե՞ Դիանան իր շպարով և զարդարանքներով է զբաղված եղել:
Մեզ համար անհերքելի փաստ է առավելապես այն, որ այս ընթացքում մեր խմբագրություն շատացել են ահազանգերը հատկապես քաղաքի աղբահանության մասով: Մարդիկ բողոքում են, որ աղբահանությունը փոխարենը նոր մոդելով և սկզբունքով իրականացվեր, հակառակը՝ մի քանի տարով հետ է գնացել: Առավոտյան 7-ին մեքենան մտնում է բակերը, զանգը տալիս, եթե հասցրիր աղբդ թափել՝ բախտավոր ես, եթե քնած մնացիր՝ կապրես գարշահոտության մեջ: Երբ տեղի բնակիչներից հետաքրքրվում ենք, թե կա՞ մի քայլ, որ արել է պաշտոնակատարը, պարզ է դառնում, որ մարդիկ Դիանայի ներկայությունը բացարձակ չեն զգացել այսքան ժամանակ՝ ոչ մի հեղափոխական մոտեցում, ոչ մի փոփոխություն. ամեն ինչ նույնն է, նույն ընթացքի մեջ:
Դրան զուգահեռ Դիանա Գասպարյանը բավականին ակտիվ է ֆեյսբուքյան տիրույթում և զբաղված է իր քաղաքական հենարանն ամրապնդելով: Դրանով էր պայմանավորված նաև քաղաքի կենտրոնական հատվածներից մեկում «Քաղաքացիական պայմանագիր» կուսակցության նոր՝ կենտրոնական գրասենյակի բացումը:
Ընտրությունների մասով չենք կարող հատկապես ուշադրություն չդարձնել այն հանգամանքին, որ Դիանա Գասպարյանի դեմ պայքարում են «Լուսավոր Հայաստան» կուսակցության թեկնածուն, փաստաբաններ, քաղաքապետարանի բաժնի պետ և մի նախկին փոխքաղաքապետ (Վազրիկ Գրիգորյանը), ով վայելում է Կարեն Գրիգորյանի ծով աջակցությունը: