«Կատոկը» հաղթեց Ադրբեջանի «հերոս» Ռամիլ Սաֆարովի քրոջը․ հայուհին պետական մակարդակով վերաբերմունքի չի արժանացել (ֆոտո)
Օրեր առաջ Վրաստանի մայրաքաղաք Թբիլիսիում կայացած «Մարտեր առանց կանոնների» մարզաձևի MMA մարտերի առաջնության ժամանակ հայուհի Կարինե Կարապետյանը, ով հայտնի է «Կատոկ» մականվամբ, հաղթեց ադրբեջանցի մարզուհուն՝ Ռենա Սաֆարովին։
Հայուհին իր հաղթանակը նվիրվեց հայ զինվոր Գուրգեն Մարգարյանին։ Նրանց, ովքեր չեն հիշում, հիշեցնենք, որ Գուրգեն Մարգարյանին քնած ժամանակ սպանել է հենց Ռենա Սաֆարովայի եղբայրը՝ Ռամիլ Սաֆարովը։
«Կատոկի» տարած այս հաղթանակի մասին պետք է բարձրաձայնվեր նախ այն բանի համար, որ, փաստորեն, հայուհին հաղթեց ադրբեջանցուն, ու նաև այն պարզ պատճառով, որ Կարինեն ոճրագործի քրոջից լուծեց հայ զինվորի թափած արյան վրեժը։
Արձագանք, սակայն, չեղավ․ Կարինե Կարապետյանին Հայաստանն ինչպես լուռ ճանապարհել էր մարտի՝ այնպես էլ լուռ դիմավորեց։
63 կգ քաշային կարգում Սաֆարովի քրոջ դեմ մենամարտելը Կարինեի ցանկությունն է եղել։ Նա պատմում է, որ դրա համար նույնիսկ քաշ է գցել, որ խնդիրներ չառաջանան։ Կատոկն՝ ինքը, այս հաղթանակը համարում է իր պարտքը՝ հայ զինվորի, իր ժողովրդի ու հայրենիքի նկատմամբ։ Նա հիշում է, թե մինչև մարտի սկսելն ինչպես է արժանացել Ռենա Սաֆարովայի թշնամական հայացքներին, բայց հայուհուն դա չի վախեցրել։
«Երբ ինձ ասացին, որ ես պետք է մենամարտեմ Սաֆարովի քրոջ հետ, այն մարդու քրոջ հետ, հաղթելու ցանկությունս ավելի մեծացավ, քանի որ նրա եղբոր ձեռքով էր 2004 թվականի փետրվարի 19-ին կացնահարվել հայ սպան՝ Գուրգեն Մարգարյանը։ Ես չէի կարող հրաժարվել մենամարտից, դա սխալ կլիներ և՛ իմ ազգի, և՛ հայ զինվորի պատվի համար»,- NEWSPRESS.am-ի հետ զրույցում Կարինե Կարապետյանը:
Մեր հարցին, թե արդյոք նրա համար պետական մակարդակով պարգևատրում կամ որևէ խրախուսանք եղե՞լ է, Կարինե Կարապետյանը բացասական պատասխանեց՝ ոչ մի ուշադրության չի արժանացել, անգամ չեն շնորհավորել։
Թեև ինքը՝ «Կատոկը», չէր ցանկանում այդ մասին խոսել, սակայն փաստն այն է, որ Սպորտի և երիտասարդության նախարարությունը չպետք է նման վերաբերմունք ցուցաբերեր հայ մարզիկի հանդեպ։ Ուզում ենք հավատալ, որ երկուսից մեկը՝ կա՛մ նախարարությունում տեղյակ չեն այս հաղթանակի մասին, որը քիչ հավանական է, կա՛մ պարզապես նոր են պատրաստվում շնորհավորել «Կատոկին»՝ ոճրագործ ադրբեջանցու քրոջ նկատմամբ տարած հաղթանակի առիթով։