Կոտայքի մարզպետը հերքում է Newspress.am-ի հրապարակումը
Կոտայքի մարզպետ Ռոմանոս Պետրոսյանն արձագանքել է NEWSPRESS.am-ի՝ սեպտեմբերի 11-ի հրապարակմանը: «Կոտայքի նորանշանակ մարզպետը պետական բյուջեով սեփական տուն է կառուցում» վերնագրով հրապարակման մեջ ներկայացված էին պարսպի և դարպասների լուսանկարներ, որոնք խմբագրությանն էին տրամադրել մտահոգված կոտայքցիներ և խնդրել էին բարձրաձայնել խնդիրը:
Հրապարակումից շաբաթներ անց Կոտայքի մարզպետն արձագանքել է խնդրին: Նա ֆեյսբուքյան իր էջում տեղադրել է տեսանյութ և ներկայացրել պարզաբանում:
Ռոմանոս Պետրոսյանը տեսանկարահանել է մինչ այդ լուսանկարում պատկերված դարպասն ու նշել, որ այն կառուցվել է 4 տարի առաջ՝ սեփական եկամուտների հաշվին: Նա ցույց է տվել նաև, թե ինչ կա դարպասներից այն կողմ. դրանք մրգատու ծառեր էին, որոնք, մարզպետի խոսքով, ինքն է ջրում ամեն անգամ՝ ժամանակ լինելու դեպքում:
Մարզպետը նաև մեղադրում է բոլոր այն լրատվամիջոցներին, որոնք փաստորեն, զրպարտել են իրեն, և անվանում է նրանց ծախված պատվիրատուներ: Թե էլի որ լրատվամիջոցներին է նկատի ունեցել նա, պարզ չէ, սակայն նկատենք, որ չնայած մարզպետի հնչեցրած մեղադրանքներին, NEWSPRESS.am-ը չի զլանում նախկին հրապարակմանը կից տեղադրել նաև մարզպետի հերքումը:
Սա արդեն իսկ խոսում է այն մասին, որ մեր լրատվական կայքը պատվիրատուներ չի կարող ունենալ, հակառակ դեպքում՝ պարզ տրամաբանությունը հուշում է, որ պատվիրատուն առնվազն թույլ չէր տա հրապարակել սույն հերքումը: