Կարճատես կառավարության հերթական խայտառակությունը
Հայաստանի արտաքին գործերի նախարարությունը դիվանագիտական անձնագրերից զրկել է ավելի քան 250 մարդու: Սա Կառավարության, իբրև թե, թափանցիկ և արդար աշխատանքի մի բաղադրիչն էր, որովհետև սովորաբար դիվանագիտական անձնագրեր ունեցող մարդիկ եղել են հայտնի պաշտոնյաներ, հարուստ քաղաքական գործիչներ, իսկ քանի որ վարչապետ Փաշինյանի կառավարությունը պայքարում է նաև նախկին պաշտոնյաների դեմ, նաև՝ հարուստների՝ ուստի առաջացավ պահանջ՝ ժողովրդի «աչքը մտնելու» համար նաև ցույց տալ, թե շատերին դուխով ոչ միայն կալանավորում են, այլ՝ զրկում դիվանագիտական անձնագրերից:
Ցավալի է, բայց փաստ. Հայաստանը դիվանագիտական անձնագրից զրկել է նաև աշխարհին Հայաստանը ներկայացնող Հենրիկ Մխիթարյանին:
Սա կառավարության հերթական կարճատեսության արդյունքն է, որովհետև Հենոն ազգի հպարտությունն է, աշխատում և վաստակում է սեփական քրտինքով, օլիգարխ պաշտոնյա չէ, և նրան դիվանագիտական անձնագիր տալն ընդամենը դյուրացրել էր աշխարհի տարբեր երկրներ մուտք գործելը:
Հենրիխ Մխիթարյանի համար դիվանագիտական անձնագիրն ընդամենը տեխնիկական դյուրացում էր, ուրիշ ոչինչ, սակայն կառավարության կարճատես գործիչները հեղափոխությանը հաջորդած այս բոլոր ամիսների ընթացքում այդպես էլ թացը չորից տարբերել չկարողացան:
Ցավալի է ևս մեկ հանգամանք. եթե Հենրիխ Մխիթարյանին դիվանագիտական անձնագրից զրկած լիներ Հանրապետական իշխանությունը, իրենց արդար ձեւացնող լրատվամիջոցները վրա կտային ու կհարձակվեին՝ դառնալով այդ պահին հայրենասերներից ամենահայրենասերը, բայց, քանի որ Մխիթարյանին դիվանագիտական անձնագրից զրկել է Փաշինյանի կառավարությունը՝ «բերանները ջուր են առել»:
Եթե Մխիթարյանին դիվանագիտական անձնագրից զրկեր Հանրապետականը, Նիկոլ Փաշինյանը կհագներ ընդդիմադիրի հայտնի պիջակն ու Ազգային ժողովում աջ ու ձախ ՀՀԿ-ականներին «պատերով կտար» ու լայվ կմտներ, իսկ հիմա՝ «Ձայն բարբառոյ՝ յանապատի»…