«Էս հողի վրա մեր հերերն արյուն են թափել, ու մենք պետք է տուն ունենանք»․ մանկատան անօթևան նախկին սաները սպասում են Թանդիլյանի խոստմանը (ֆոտո)
NEWSPRESS.am-ն արդեն մեկ անգամ անդրադարձել է «Զատիկ» մանկատան նախկին սաներին, ովքեր կառավարության դիմաց հացադուլ էին անում 2 շաբաթ առաջ։ Այսօր նորից տղաները սկսեցին իրենց հացադուլը։ NEWSPRESS.am-ը նորից զրուցել է տղաների հետ ու պարզել, թե նրանց հարցն ինչ ընթացք ստացավ։
«Երեկ ենք նորից սկսել ու Անկախության տոնի հետ կապված գնացել էինք ու մեզ հաճելի չէր, որ դրսում տեսնեն, որ մեր ազգում սենց խնդիր կա։ Մեկ շաբաթ առաջ Մանե Թանդիլյանի և իր տեղակալ Արսեն Մանուկյանի հետ ենք հանդիպել նախարարությունում։ Ասացին, որ կզբաղվեն, կլուծեն, կզանգեն ու արդեն 1 շաբաթ է, որ ձայն չկա։ Մեր տղաներից մի քանիսին ասացին, որ Մարալիկում տուն կտան, բայց չտվեցին։ Մեզ հետ պայքարող Մելինեին երեկվա դրությամբ տուն պիտի տային, սակայն չտվեցին, քանի որ այդ տանը 4 տարի է՝ մարդ է ապրում, ու դուրս չեկավ։ Մանե Թանդիլյանի տեղակալին՝ Մանուկյանին էլ ասում եմ, որ մնալու տեղ չունեմ այսօր՝ ի՞նչ անեմ։ Նա էլ ասում է՝ մի քանի օր համբերի»։
Հացադուլ անող տղաներն ընդգծեցին, որ իրենք 4 հոգով են այստեղ, սակայն պայքարում են 221 հոգու համար։
«Այստեղ հացադուլ ենք անում 4 հոգով։ Մեր տղաներից մեկն էլ 8 օր հացադուլի մեջ լինելով՝ տանում են ռեանիմացիա, քանի որ վիճակը վատանում էր։ Հիվանդանոցից փող են ուզել, ու պիտի էդ ամենը պետպատվերով լինի, սակայն նախարարությունը թուղթ չտվեց, իսկ հիվանդասենյակների մեկ օրն արժե մեծ գումար, ու արդյունքում նա դուրս եկավ հիվանդանոցից։ Հիմա էլ նրա վիճակը վատ է»։
Տղաները նշեցին, որ առաջիկայում պատրաստվում են իրենց հարցերով դիմել նոր քաղաքապետին։
«2 օր առաջ մասնակցել ենք ընտրություններին, քաղաքապետ ենք ընտրել, ով վարչապետի վստահված անձն է։ Էլ չենք անհանգստացնելու վարչապետին ու քաղաքապետին պետք է դիմենք, քանի որ ձմեռվա ցրտերն են մոտենում։ Եթե լուծում չգտնի քաղաքապետը, ապա մի խումբ մարդիկ իրենց ընտանիքներով կգնանք էս երկրից։ Մենք էստեղի քաղաքացի ենք, ընտրում ենք, ուզում ենք ապրենք։ Էս հողի վրա մեր հերերն արյուն են թափել ու մենք պետք է տուն ունենանք, ուզում ենք ապրենք, ոչ այլ բան»։
Հավելենք նաև, որ տղաներն այսօր գիշերելու են կառավարության դիմաց։