«Կարող ա հանկարծ մի բան էն չխոսանք»․ ինչի՞ մասին էին լռում Երևան-Արմավիր երթուղու վարորդները (տեսանյութ)
Երևան-Արմավիր երթուղու վարորդներն իրենց մեքենաները կայանել են կառավարության շենքի դիմաց և սպառնում են՝ չեն սպասարկի երթուղին այնքան ժամանակ, մինչև վարչապետ Նիկոլ Փաշինյանը չլուծի իրենց խնդիրը։
Չնայած այս վճռականությանը՝ վարորդները հրաժարվում էին կառավարության դիմաց հավաքված լրագրողներին ներկայացնել, թե ինչի համար են հավաքվել։ Նրանցից ոչ ոք չէր ցանկանում ուղիղ տեսախցիկի առաջ խոսել։
«Աղջիկ ջան, հիմա մեր ղեկավարը տրանսպորտի նախարարի մոտ ա, մենք կարող ա մի բան սխալ ասենք, կամ մի բան էն չխոսանք, թող դուրս գա՝ ինքը ինչ պետք ա՝ կասի»,-NEWSPRESS.am-ի հետ զրույցում ասաց մի վարորդ, ով չէր ցանկանում նկարահանվել, բայց խնդիրը ներկայացրեց։
Մեր ճշտող հարցին, թե արդյո՞ք այս բողոքի ակցիան «Գալակտիկա տրանս սերվիս»-ի հիմնադիր-տնօրեն Շուշան Խաչատրյանի նախաձեռնությունն է, վարորդները պատասխանեցին, թե իրենք իրենց կամքով են եկել կառավարություն։
«Բա ի՞նչ անենք, ո՞ւր գնանք, աղջիկ ջան, դու կարա՞ս մեր հարցը լուծես՝ չես կարա, հիմա եթե Փաշինյանը լուծեց՝ լուծեց, եթե չէ՝ էս հարցը սենց էլ կմնա»,-ասաց մեր զրուցակիցը՝ հավելելով, որ 20-ից ավել նոր մեքենաներ են բերել, բայց չեն աշխատում, քանի որ իրենց դեղին համարներ չեն տալիս։
Նկատենք, որ «Գալակտիկա տրանս սերվիս»-ի հիմնադիր-տնօրեն Շուշան Խաչատրյանը վարորդների հետ մեկ անգամ չէ, որ դիմել է կառավարություն։ Նրանք պնդում են, թե իբր տենդերն իրենք շահել են, սակայն անօրինական գիծ մտած մեքենաները խանգարում են իրենց աշխատել։
Ու չնայած նրանք խոսում էին խնդրի մասին, բայց տարօրինակ ձևով խուսափում էին տեսախցիկից։ NEWSPRESS.am-ի դիտարկմանը, թե՝ կարծես վարորդները ինչ-որ բան թերի են ասում, կամ ճիշտ չեն ներկայացնում՝ վարորդներից մեկը կես-կատակ արձագանքեց, թե՝ որ իրեն ծեծեն՝ կասի։
Հավելենք միայն, որ նախարարությունից խնդրին լուծում չեն տվել՝ նշելով, որ տվյալ խնդիրը ոչ թե պահային լուծում է, այլ շարունակական որոշակի միջոցառումների արդյունքում պետք է լուծվի: Խնդիրը նախկինում կարգավորվել է Տրանսպորտի նախարարության ենթակայության տակ գործող տրանսպորտային տեսչության կողմից, որը հիմա լուծարվել է:
Կա նաև տեսակետ, որ իրականում ապօրինի մեքենաները, որոնց մասին այդքան խոսում են, ևս պատկանում են Շուշան Խաչատրյանին, կամ նրա հովանավորին, ով, արամվիրցիների խոսքով, աշխատում է ԱԱԾ-ում։ Ու թեև Շուշան Խաչատրյանը համառորեն պնդում, թե նման բան չկա, սական վարորդները ևս վախենում էին տեսախցիկի առաջ երևալ, զուտ այն պատճառով, որ ավելորդ ոչինչ չասեն։
Ներկայացնում ենք NEWSPRESS.am-ի տեսանյութը, որտեղ վարորդների դեմքերը չեն երևում՝ իրենց իսկ խնդրանքով։
Մանրամասները՝ տեսանյութում․