Երեխաները հուշակոթողի մոտ սպասում էին Ձեզ, մտածում էինք՝ կմոտենաք, բայց անտարբեր անցաք. զոհվածների ծնողները՝ Փաշինյանին

Զոհվածների մայրերն ու այրիները «Եռաբլուր» զինվորական պանթեոնում իրենց խնդիրը ներկայացրին վարչապետ Նիկոլ Փաշինյանին:

Վերջինս պետական այրերի հետ եկել էր հարգանքի տուրք մատուցելու զոհվածների հիշատակին:

Որդեկորույս մայրերը նկատեցին, որ անարդար է, երբ զոհվածների համար գումարները հատկացվում են խիստ զգալի տարբերությամբ: Փաշինյանն սկսեց ներկայացնել հատկացման կարգը, որին ծնողները քաջատեղյակ էին և ընդհատեցին Փաշինյանին, թե այդ մասին տեղյակ են: Նրանք չէին հասցրել իրենց անհանգստացնող հարցն ուղղել վարչապետին, երբ նա բարկացավ.

«ժողովուրդ ջան, դե տենց չեղավ, եթե դուք գիտեք ու պետք է խոսեք՝ ես գնամ»,-ասաց Փաշինյանն ու շարունակեց բացատրել հատկացման կարգը:

Նա նկատեց նաև, որ նյութական օժանդակության համար հատկացված ֆոնդը հնարավորություն ունի գումարներ տրամադրել միայն 2015 թվականի զոհվածների ընտանիքներին: Ծնողների դիտարկմանը, թե խոսքը վերաբերում է նաև նոր զոհերին, վարչապետը նկատեց, որ ամեն ինչ կվերանայեն:

Ծնողներից մեկը նշեց, որ պարզապես վիրավորական է, որ մյուսները մեծ գումարներ են ստանում. «Հիմա ինչ եմ ուզում ասել՝ տալիս են շատ մեծ գումարներ՝ 220 000-300 000 դրամ....»:

«Ես չեմ կարծում, թե 220 000-ը շատ մեծ գումար է»,- զոհվածի մորն ընդհատեց վարչապետը: Կինը հակադարձեց. «Բա որ մեզ 30 հազար են տալի՞ս...»,- ասաց նա:

Կանայք պահանջեցին նաև առանձին հանդիպում վարչապետի հետ, սակայն վերջինս առարկեց. «Բա հիմա հանդիպել ենք՝ լսում եմ...»:

Ծնողներից մեկն էլ նշեց, որ եթե Փաշինյանը գալիս է պանթեոն՝ պաշտոնյաների հետ հարգանքի տուրք մատուցելու, ապա չպետք է մոռանա անհետ կորածներին:

«Հակամարտությունից հետո մենք 1000-ից ավելի անհետ կորածներ ենք ունեցել, հուշակոթող է կանգնեցվել նրանց հիշատակին: Մեր երեխաները կանգնած այդ հուշակոթողի մոտ սպասում էին Ձեզ, որ արտասանեն, մտածում էինք՝ կմոտենաք, բայց անտարբեր անցաք»,- վրդովված ասաց կինը:

Վարչապետը նկատեց. «Քանի՞ զինվոր կա զոհված, ես բոլորին հատ-հատ չեմ կարող մոտենալ, ա՛յ, վերևում որ ծաղկեպսակ դրեցինք, դա բոլոր հերոսների համար էր»:

Ամեն դեպքում, ծնողները նրան ստիպեցին հետ գնալ՝ անհետ կորած զինվորների հուշաքարի մոտ, հարգել նրանց հիշատակը և ծաղիկներ դնել հուշակոթողին: