Չեմ կարծում՝ Հայաստանում ինչ-որ մեկը գիտի՝ ինչ է կատարվում. Ռոբերտ Քոչարյանի հարցազրույցը՝ Коммерсантъ-ին (հատված)
ՀՀ երկրորդ նախագահ Ռոբերտ Քոչարյանը հարցազրույց է տվել Коммерсантъ-ի հատուկ թղթակից Վլադիմիր Սոլովյովին: Հարցազրույցը ներկայացնում ենք հատվածաբար:
-Ռոբերտ Քոչարյանը վերադարձել է քաղաքականություն: Ի՞նչ է դա նշանակում:
-Դա նշանակում է, որ նա վերադարձել է քաղաքականություն:
-Ինչպիսի՞ հավակնություններ ունեք: Ուզում եք երկրի նախկին ղեկավարից դառնալ գործո՞ղ ղեկավար:
-Առաջին հերթին, ես երբեք քաղաքականությունից չեմ հեռացել: Ինչպես հաճելի է ասել, նախագահները քաղաքականությունից չեն հեռանում: Տասը տարի ես պասիվ էի: Արտահայտել եմ իմ տեսակետը սկզբունքային հարցերում, որոնց համաձայն չեմ եղել, բայց այլ ակտիվություն չեմ դրսևորել: Հիմա ես շատ ավելի ակտիվ պետք է արտահայտվեմ:
-Արդեն արտահայտվում եք:
-Արդեն արտահայտվում եմ: Ես պետք է ներգրավվեմ քաղաքական գործընթացներում: Ինչպիսի ֆորմատո՞վ: Դա կարող է լինել կուսակցություն, կարող է լինել շարժում, կարող է ակտիվ համագործակցություն լինել որևէ կուսակցության հետ, կարող է լինել անհատականացված կամ ոչ:
-Հայաստանում վերջին շրջանում իրադարձություններն արագ են զարգանում և իրավիճակն արագ է փոխվում: Քչերն են, ովքեր հստակ պատկերացում ունեն, թե երբ կարող են տեղի ունենալ արտահերթ խորհրդարանական ընտրությունները: Նիկոլ Փաշինյանն ասում է, որ դրանք կարող են կայանալ մինչ այս տարեվերջ կամ էլ մյուս տարի: Դա նշանակում է, որ Ձեզ համար լավ կլինի որոշում կայացնել՝ աջակցո՞ւմ եք Դուք Հանրապետական կուսակցությանը, թե Դուք սեփական ինչ-որ բան կունանաք: Ո՞ր տարբերակին եք ավելի հակված:
-Կարելի է ասել, որ դեռ չի որոշվել: Այդ թվում՝ թե ինչ է կատարվում:
-Իսկ ի՞նչ է կատարվում:
-Չեմ կարծում, որ Հայաստանում ինչ-որ մեկը գիտի՝ ինչ է կատարվում:
-Լավ: Իսկ ի՞նչ է կատարվել Հայաստանում: Ահա մայիսյան իրադարձությունները: Ըստ Ձեզ՝ ի՞նչ էին դրանք:
-Դա իշխանափոխություն էր: Կարծում եմ՝ Փաշինյանը զգաց դժգոհ տրամադրությունները և ժամանակին գլխավորեց նրանց, ինչը բերեց իշխանության փոփոխության: Դա տպավորիչ էր:
-Ես մայիսին Հայաստանում էի և մարդկանց մեծ քանակություն տեսա: Մի՞թե նախորդ իշխանությունն այդքան զզվեցրել էր ժողովրդին:
-Կարծում եմ՝ նախորդ իշխանությունից հոգնել էին, լճացման զգացողություն կար: Հակառակ դեպքում՝ դժվար թե նման զանգվածային շարժում լիներ: Բայց գիտե՞ք՝ կարելի է իշխանության գալ պոպուլիզմով. ժամանակակից պատմության մեջ նման օրինակները շատ են: Նման իրավիճակներում հեշտ է իշխանության գալ, և դժվար է հեռանալ դրանից: Դու գալիս ես պոպուլիզմով, իսկ հեռանալ պետք է արժանապատվորեն՝ իրական արդյունքներով: Չորս ամիսը ցույց տվեց, որ բոլոր խնդիրները բոլոր ուղղություններով խորանում են: Եվ դա իմ՝ քաղաքականություն վերադառնալու պատճառներից մեկն է:
-Չորս ամիսը բավարա՞ր ժամանակ է՝ գնահատելու համար իշխանության հաջողությունն ու անհաջողությունը, կոմպետենտությունն ու ոչ կոմպետենտությունը:
-Այդ ժամանակահատվածը բավարար է, որպեսզի հասկանալ, թե որքանով է կոմպետենտ իշխանությունը, ինչպիսի արժեքների վրա է հենվում և ընդունա՞կ է այն համակարգային աշխատանքի: Լրիվ բավարար է:
-Ի՞նչ հասկացաք այս չորս ամսվա ընթացքում նոր իշխանության մասին:
-Որ այն քաոսային է, տնտեսության մեջ չի կողմնորոշվում, գործողությունների հստակ ծրագիր չունեն: Կառավարության կազմը ընտրողական է, չկան հստակ աշխարհաքաղաքական առաջնահերթություններ: Իշխանությունը նախ պետք է փայտ կտրի, հետո փորձի այն հերոսաբար այն մանրացնի: Դա այսօրվա իշխանության հստակ պատկերն է: Անհասկանալի է, թե ինչ թիմ է սա: Կա բավականին վառ լիդեր, բայց նրա անհասկանալի հակվածությունը պոպուլիզմին, լուրջ անհանգստություն է պատճառում: Դա ինձ հիշեցնում է լատինաամերիկյան պոպուլիզմը՝ Ուգո Չավեսի ոճով...