Ում համար՝ «սելֆիի ժամը» պարտություն, ում համար՝ հաղթանակ․ քարոզարշավ՝ պետբյուջեի հաշվին
Մշակույթի նորանշանակ նախարար Լիլիթ Մակունցն իր ասուլիսին այն աստիճան ասելիք չուներ, որ որոշել է գոնե հենց բուն ասուլիսը «ասելիք» սարքել։
Անկախության տոնի՝ սեպտեմբերի 21-ի տոնակատարության առթիվ կազմակերպվելիք միջոցառումների մասին նախարարը որոշել էր տեղեկացնել բացօթյա ասուլիսով՝ Հանրապետության հրապարակի կենտրոնում։ Ասում են՝ հաջորդ անգամ ավելի օրիգինալ տարբերակ է լինելու։ Այնպես որ՝ կարծում ենք՝ չի բացառվում, որ նախարարը, ասենք, օդապարիկներով ասուլիս կազմակերպի՝ տպավորություն թողնելու համար։ Բայց ժամանակից առաջ չընկնենք ու առայժմ խոսենք Հանրապետության հրապարակի կենտրոնում անցկացված ասուլիսի մասին։
Կարևոր չէ, թե կոնկրետ ում մտահղացումն էր այս «կրեատիվ» մոտեցումը, քանի որ Մակունցը կարող էր պարզապես այն չընդունել՝ մտահղացումը չի պարտադրվել։ Բայց արի ու տես, որ երիտասարդ նախարարուհուն այնքան չի հուզում միջոցառումների ընթացքը, որքան դրա մասին տեղեկացնելու «խանդավառությունը»՝ ինչպես կասեր ինքը։
Ընդամենը 20-25 րոպե տևած ասուլիսի համար հսկայական տեխնիկա և գույք էին քարշ տվել Հրապարակի կենտրոն և որ դրա համար, անշուշտ, նաև գումար են ծախսել։ Էլ չասենք, որ արևի տակ լրագրողները ստիպված էին սպասել մոտ 20 րոպե, մինչև կսկսի ասուլիսը ու ևս այդքան էլ արևի տակ մնալ ասուլիսի ընթացքում։ Բացի այդ էլ անցուդարձ անող մեքենաների պատճառով բարձրացած աղմուկը խանգարում էր բանախոսների ձայնին, և ասելիքն աղմկոտ էր ստացվում։
Չենք քննարկում, որ ընդհանրապես ասելիք էլ չկար, և այն սահմանափակվեց օրվա առիթով կազմակերպվելիք միջոցառումների ժամանակացույցով, որը շատ հեշտությամբ կարելի էր տեղադրել կայքէջում, որպեսզի մարդիկ տեղեկացված լինեին միջոցառումների մասին (ինչպես արվել է մինչ օրս)։
Ասուլիսի «մեխը» կարելի է համարել միջոցառման ծրագրերի մեջ որպես «նորարարություն» ընդգրկված «սելֆիի ժամը»։
Սելֆին թերևս միակ հաջողված գործն է, որն այս իշխանությունը կատարում է անթերի։ Սելֆիի ժամը նախատեսված է ժամը 14։00-ին Հանրապետության հրապարակում, որի ժամանակ քաղաքացիները կարող են նկարվել ճանաչված մարդկանց հետ։
Հարկ է նկատել, սակայն, որ սեպտեմբերի 21-ը համընկնում է Երևանի ավագանու թեկնածուների նախընտրական քարոզարշավի վերջին օրվա հետ։ Մակունցն այս մասին հոգացել է․ նա թեկնածուներին հրավիրում է հրապարակ՝ մասնակցելու «սելֆիի ժամին»։
Նախ՝ շատ քիչ հավանական է, որ բոլոր կուսակցությունները ներկայացնող ավագանու թեկնածուներն այդ ժամին լինեն հրապարակում, բայց եթե նույնիսկ լինեն, ապա միևնույնն է, նախարարության կողմից նախաձեռնած այս «կինոյի հերոսը» լինելու է գործադիրի ղեկավարի կողմից առաջադրված թեկնածուն՝ Հայկ Մարությանը, ով նաև սիրված ու շատ տաղանդավոր դերասան է, ու հենց նա էլ կլինի բոլոր սելֆիների կենտրոնում։
Փաստորեն, քարոզարշավի վերջին օրը պետությունը մեծ շուքով իր բյուջեից 100 մլն դրամ կծախսի, որպեսզի քաղաքացիները «խանդավառված» գնան ընտրության և ընտրեն այն թեկնածուին, ում հետ ամենաշատ սելֆիներն են արել։
Այս ամենը նախընտրական կաշառքի պես մի բան է հիշեցնում։ Ու ստացվում է, որ «Դու անկախ ես» կարգախոսով կազմակերպվող տոնակատարության մասնակիցներին կառավարությունը, անկախ ամեն ինչից, կախման մեջ է գցում։
Այնպես որ՝ ում համար անկախության տոնակատարությունը՝ որպես «սելֆիի ժամ», ում համար՝ պարտություն, ում համար՝ անվճար քարոզարշավ:
Արմինե Մկրտումյան