Անկախ այն բանից՝ ով է սպանել Տիգրան Աբգարյանին, դրանից ԱԱԾ և ՀՔԾ պետերի հեռախոսազրույցը չի արդարացվում. Օրբելյան
Նորից նույն սխեման է աշխատում: Իրավապահները փորձում են հանրությանը ներկայացնել ինչ-որ ցնցող տեղեկություն՝ դրանով շեղելով խնդիրը բուն էությունից: Այդ մասին այսօր Ռոբերտ Քոչարյանի փաստաբանների ասուլիսի ժամանակ ասաց Հայկ Ալումյանը:
«Ասում են՝ Աբգարյանը սպանվել է հատուկջոկատայինների կողմից: Դա շատ լուրջ հայտարարություն է: Այդ հայտարարությունն անողը՝ որպես իրավապահ մարմիններից մեկի ղեկավար, պիտի արդեն առնվազն կրակողի անունն իմանար, առնվազն պիտի արդեն մեղադրանք առաջադրված լիներ, էլ չեմ ասում՝ պիտի օրինական ուժի մեջ մտած դատավճիռ լիներ: Քրեական դատավարության օրենսգիրքն ասում է, որ եթե կան բավարար հիմքեր, ապա առաջադրվում է մեղադրանք: Իրենք դեռ այդ մարդուն մեղադրանք չեն առաջադրել, դեռ չունեն այդ աստիճանի ապացույցներ, որպեսզի կարողանան ասել՝ ով է դա արել, բայց արդեն իրենք ասում են, թե արվել է այսինչ ուժերի կողմից և այսինչ նպատակներով: Չի կարելի այսպես»,- ասաց Ալումյանը:
Ըստ նրա՝ եթե բավարար ապացույցներ կան, ապա պիտի լիներ նաև մեղադրյալը՝ կրակողը:
«Այսօրվա դրությամբ իրենք համարում են, որ իրենց ապացույցները բավարար չեն՝ որևէ մեկին մեղադրանք առաջադրելու համար, բայց նաև բավարար են, որ այսպիսի ինֆորմացիայով հանրության մոտ տպավորություն ստեղծեն: Սա լուրջ խնդիրներից է՝ հանրության ուշադրությունն անընդհատ շեղելու գոյություն չունեցող կամ թույլ հիմնավորվող փաստերի վրա: Շատ մեծ հուզական էլեմենտ կա այս գործի մեջ: Հերիք է մի այսպիսի բան ասեն, մարդկանց մոտ կարող է թշնամանք առաջանալ մեկի նկատմամբ, ով կարող է պարզվի կապ չունի դրա հետ: Չի կարելի այսպիսի մանիպուլյացիա անել»,- նկատեց Ալումյանը:
Պաշտպան Արամ Օրբելյանն էլ իր հերթին նշեց, որ անկախ այն բանից, թե ով է սպանել Տիգրան Աբգարյանի, ինչ հանգամանքներում, ինչ նպատակով, հեռախոսազրույցը դրանից չի արդարացվում:
«Այսինքն՝ տեղի է ունեցել երկու բարձրաստիճան իրավապահ մարմինների ղեկավարների զրույց, որի ժամանակ շատ հստակ արձանագրվել է դատական գործին միջամտելու ռեալ հավանականություն, որից հետո տեղի է ունեցել բարձրաստիճան քաղաքական ղեկավարության ելույթն Ազգային ժողովում, որի ժամանակ հաստատել է, որ եղել են զանգեր: Ես չեմ բացառում, որ և՛ դատավորը, և՛ պարոն Վանեցյանը ճիշտ են ասում, որ չեն խոսել իրար հետ, այլ խոսել են ինչ-որ միջնորդի միջոցով: Մենք բոլորս՝ ներառյալ մեր վստահորդը, ուզում ենք Մարտի 1-ի բացահայտումը: Տպավորություն է, որ մի մասն ուզում է բացահայտվի, մի մասը՝ չի ուզում: Եթե պարզի, որ սպանվել է հատուկջոկատայինի կողմից, ապա, այո, ոչ թե հատուկջոկատային, այլ քաղաքացի x-ը, y-ը պիտի ենթարկվի պատասխանատվության»,- նշեց Օրբելյանը: