Հների պրիմիտիվ գործելաո՞ճ, թե՞ նորերի մանկական չարաճճիություն․ ովքե՞ր և ինչո՞ւ են պատռում քաղաքապետի թեկնածուների պաստառները (ֆոտո)
Երբ Ազգային ժողովի «Ելք» խմբակցությունը պառակտվեց ու որոշեց Երևանի ավագանու ընտրություններին մասնակցել տարբեր թեկնածուներով, դա այնքան էլ չզարմացրեց։
ԱԺ ընտրություններին մասնակցելու համար իրենց միությունը հաստատած ու միմյանց «տեր ու հնազանդ» լինելու երդում տված «Լուսավոր Հայաստան», «Հանրապետություն» և «Քաղաքացիական պայմանագիր» կուսակցությունների ղեկավարների միջև սև կատու էր անցել այն բանից հետո, երբ առաջին երկու ուժերի ղեկավարներ Արամ Սարգսյանն ու Էդմոն Մարուքյանը, Նիկոլ Փաշինյանի հետ դուրս չեկան փողոց ու չմիացան պայքարին։
Չէի՞ն հավատում հաղթանակին, թե՞ կար մեկ այլ խոչընդոտ, չենք քննարկում, փաստն այն է, որ Նիկոլ Փաշինյանը, հավանաբար, չներեց իր «ընտանիքի անդամների դավաճանությունն» ու ապահարզան պահանջեց։ Իսկ իր իշխանության գալուց հետո, նա հազիվ երկու պորտֆել հատկացրեց նրանց, այնպես, ինչպես ամուսնալուծությունից հետո, պարտադրված, ալիմենտ են տալիս։
Երևանի ավագանու ընտրություններին ընդառաջ էլ, Էդմոն Մարուքյանն ու Արամ Սարգսյանը որոշեցին չսատարել Նիկոլ Փաշինյանի առաջադրած թեկնածու՝ կոմիկ-դերասան Հայկ Մարությանին և առաջադրեցին իրենց թեկնածուին՝ Արդարադատության նախարար Արտակ Զեյնալյանին։
Այսպես ծնվեցին «Լույս» և «Իմ քայլը» դաշինքները։
Կա տեսակետ, որ այս եռյակի «ամուսնությունից» ծնված դաշինքներն ստեղծվել են, ինչպես ասում են, ձայներ փախցնելու համար։ Հաշվի առնելով, որ այսօր ուժեղ մրցակից համարվում է «Բարգավաճ Հայաստան» կուսակցության կողմից առաջադրված թեկնածուն, ուստի չի բացառվում, որ այս ֆիկտիվ ամուսնալուծությունն ուղղված է հենց ԲՀԿ թեկնածուի դեմ։ Հավանաբար, հենց այս կասկածները ցրելու համար, կամ չգիտես ինչ այլ նկատառումներով, «Լույս» և «Իմ քայլը» դաշինքի թեկնածուների պաստառները փակվում են մեկը մյուսով։ Ոչ միայն տարբեր պատերին փակցված՝ Զեյնալյանի նկարները փակվում են Մարությանի նկարներով և հակառակը, այլև այդ պոկոտված պաստառները, ինչ-որ շահագրգիռ անձինք, նկարում են ու ակտիվ տարածում համացանցում։
Թե որն է այս ամենի նպատակը, չենք քննարկում և մեկնաբանությունները թողնում ենք ընթերցողին։ Ինչպես նաև, քարոզարշավային այս օրերին, խուսափելով հակաքարոզչությունից կամ հակահեղափոխական որակումը ստանալու «վտանգից», պարզապես նկատենք, որ եթե ամեն ինչ լուրջ է, ու երկու դաշինքների միջև մրցակցությունն իրական է, ապա հարկավոր է հիշեցնել երիտասարդ ուժերին, որ պաստառները մեկը մյուսով փակելու և դրանք պատռելու սովորությունը պրիմիտիվ հակաքարոզչական գործելաոճ է, որը հատուկ էր նախորդ իշխանություններին։ Ու մանկական չարաճճիություններով զբաղվելու փոխարեն, լավ կլիներ, որ նոր իշխանության ներկայացուցիչները նպատակային և հստակ աշխատանքներ իրականացնեն՝ համոզելով, հրամցնելով ու ամբողջապես ներկայացնելով ծրագրեր՝ իրենց լուծումներով։
Հ․Գ․ Ի միջայլոց․ օրերս Դավթաշենում կազմակերպված քարոզարշավի ժամանակ, «Իմ քայլը» դաշինքի թեկնածու Հայկ Մարությանի համախոհները, բարձր վանկարկումներով խանգարեցին ԲՀԿ քաղաքապետի թեկնածու Նաիրա Զոհրաբյանի քարոզը։ Բացի այդ, ավելի երիտասարդներն ու երեխաները, մեքենաներով ու հեծանիվներով անցնում էին մայթեզրով, որտեղով իրականացվում էր ԲՀԿ քայլերթը և փորձում էին քարոզել «Իմ քայլը» դաշինքի թեկնածուին։
Արմեն Սահակյան