ՀՖՖ-ն քո խելքի բանը չէ, հեռո՛ւ քաշվիր, ա՛յ անտաղանդ
Սեպտեմբերի 22-ին կայանալու է ՀՖՖ հիմնադիր ժողովը, որի ընթացքում անցկացվելու են ՀՖՖ նախագահի և Գործկոմի անդամների ընտրություններ։
Հետաքրքրականը ոչ թե ՀՖՖ գործկոմի ընտրությունն է, այլ այն, որ ֆուտբոլի ֆեդերացիա են գրոհել կառավարության նորեկները։
Օրինակ՝ ՀՖՖ գործկոմի անդամներ են առաջադրվել Արթուր Վանեցյանը, Արսեն Թորոսյանը, Սուրեն Պապիկյանը, Արեն Մկրտչյանը, Ալեն Սիմոնյանը և այլոք։
Այս թեկնածուները մարդիկ են, ովքեր իրենց վստահված ոլորտներում որևէ առաջընթաց չեն գրանցել, ավելին՝ արձանագրել են միայն հետընթաց և հիմա պատրաստվում են նույնն անել ֆուտբոլային աշխարհում դեռևս հստակ իր դիրքն ու տեղը չգտնող հայկական ֆուտբոլում։
Ահավասիկ՝ Առողջապահության նախարար Արսեն Թորոսյան․ սույն պաշտոնյան առողջապահության ոլորտի հետ բացարձակ կապ չունի և նախարարի պաշտոնին բախտի բերմամբ հայտնվելով՝ անգամ 100 օր անց էլ չկարողացավ սեղանին դնել ոլորտում արված որևէ կարևոր քայլ։
Թորոսյանն այս 100 օրերի ընթացքում հասցրել է, օրինակ, ոչ աշխատանքային՝ կիրակի օրով հայտարարել, թե այլևս չի լինելու «Գլխավոր մասնագետների ինստիտուտը», որից հետո արել ասածի հակառակը՝ նույն նշանակումները՝ պարզապես գլխավոր մասնագետ որակումը փոխարինելով «խորհրդատու» ձեւակերպմամբ:
Այս 100 օրերի ընթացքում Թորոսյանը հասցրել է տիտղոսից զրկել այնպիսի անվանի բժիշկների, ինչպիսիք են ՀՀ վաստակավոր բժիշկ, ԵՊԲՀ պլաստիկ վիրաբուժության եւ միկրովիրաբուժության ամբիոնի վարիչ Արտավազդ Սահակյանը, ԵՊԲՀ Ստոմատոլոգիայի ֆակուլտետի դեկան, ստոմատոլոգների ասոցիացիայի նախագահ, բժշկական գիտությունների դոկտոր Լազար Եսայանը և այլք։
Եվ սա դեռ ամենը չէ. բժշկությանն ու բժշկագիտությանը սույն պարոնը հասցրել է ևս մի քանի ապտակ՝ իր մտերիմներին նշանակել է խորհրդատուներ՝ որպես հիմք ընդունելով նրանց «պրոֆեսիոնալիզմը»:
Արսեն Թորոսյանն իր պաշտոնավարման այս կարճ և խայտառակ ժամանակահատվածում արդեն հասցրել է լինել նաև դատարանում՝ նրան դատի է տվել «Գրիգոր Լուսավորիչ» բժշկական կենտրոնի նախկին տնօրեն Արա Մինասյանը:
Պետությանը հասցրած այսքան վնասը, փաստորեն, բավական չէ. հիմա էլ Թորոսյանը որոշել է իրեն ցույց տալ նաև ֆուտբոլում՝ ապտակներ հասցնելով նաև հայկական ֆուտբոլին։
Նշենք, որ ՀՖՖ գործկոմի անդամի թեկնածության մասին Արսեն Թորոսյանն արձագանքել է դարձյալ միակ հարթակում, որտեղ իրեն զգում է ինչպես ձուկը ջրում, և նշել, որ այդ պաշտոնում զբաղվելու է առավելապես իր մասնագիտական ոլորտին առնչվող բժշկական ապահովման հարցերով:
Հասարակությանը թերհաս որակող Թորոսյանն ի՞նչ կարող է անել ՀՖՖ գործկոմում, դեռ անհայտ է, սակայն հաշվի առնելով թորոսյանական ձախողումների շղթան ,նրան պարզապես ուզում ես խորհուրդ տալ՝ ՀՖՖ-ն քո խելքի բանը չէ, հեռո՛ւ քաշվիր, ա՛յ անտաղանդ: