Ինչո՞ւ ձայնագրությունը տարածվեց հենց հիմա և ովքե՞ր կարող էին այն տարածել․ վարկածներ
Միջազգային երկու խոշորագույն լրատվական կազմակերպությունների՝ SEEMO-ի և IPI-ի խորհուրդների անդամ, NEWSPRESS.am-ի հիմնադիր Արիանա Հովսեփյանը ֆեյսբուքյան իր էջում գրել է․
«Ձայնագրել ու հրապարակել են Հայաստան պետության ազգային անվտանգության ծառայության տնօրենի խոսակցությունը։ Այս մի նախադասությունը թերևս բավական է, որ բնութագրի այն ամբողջ խայտառակությունը, որը հրապարակվեց այսօր։ Ազգային անվտանգության ծառայության պետն ընդունում է, որ ձայնագրությունում իր խոսքն է ՀՔԾ պետ Սասուն Խաչատրյանի հետ։ Ու սա էլ ամենը չէ․ ամենայն ազնվությամբ անկեղծանում է, թե՝ մտքներովս չէր անցնի, որ մեզ կձայնագրեն։
Հիմա արդեն հետշոկային արդարացումների մասին։
Կանխազգալով մոտալուտ վտանգը, որ ուր որ է ձայնագրությունը վերջնականապես կտարածվի հանրության մեջ ու կցրի միֆը, թե իշխանափոխությունից հետո իրավիճակ է փոխվել, ու որ դատարաններն այլևս նախկինի պես՝ Բաղրամյան 26-ից չեն կառավարվում, վարչապետ Փաշինյանը մտնում է ուղիղ եթեր, ուր «տաքացած ամբոխը» սպասում է, որ սիրելի վարչապետը «մի բան» ասի։ Վարչապետին մնում է իրականում սպառնալիքով, թե՝ մի աղմկեք, թե չէ՝ այլևս կոռուպցիոն բացահայտումներ չենք անի ու տնտեսությունը կխորտակվի, բայց առերես ժպիտով ասել՝ Վանեցյանին ու Խաչատրյանին չի պատրաստվում պատժել, որովհետև նրանք իր «մեջքին կանգնած են»։
Սեփական պաշտոնյաների «վառվելուց» այլայլված Փաշինյանը սկսում է հնչեղ-գունեղ անուններ տալ, ընդհուպ մինչև Գագիկ Խաչատրյան, Հովիկ Աբրահամյան, Պողոս-Պետրոս-Մարտիրոս։ Բայց դրանից չի փոխվում այլևս իրողությունը, որ դատարաններն ոչ միայն անկախ չեն, այլև կառավարվում են անձամբ ՀՔԾ պետի, ԱԱԾ պետի և կամ վարչապետի կողմից։ Այդ դեպքում՝ ինչո՞ւ չփակել դատարանները, բոլոր գործերի նախաքննությունն ու վճիռներ կայացնելը թողնել վարչապետին, նրան էլ միապետ կարգել։
Ինչ վերաբերում է ձայնագրության տարածմանը։
Եթե դա արվել է ԱԱԾ աշխատակիցներից մեկի կողմից, ենթադրենք որևէ ընդդիմադիր ուժի հետ համաձայնեցված կամ պատվերով, ապա էլ ավելի վատ։ Որքան տեղում չէ ղեկավարը, երբ շարքային աշխատակիցը կարող է ձայնագրել ու տարածել իր ղեկավարի խոսքը։
Եթե ռուսական կողմն է տարածում ձայնագրությունը, ինչը հավանական է այնքանով, որ ձայնագրությունը թարգմանված է նաև անգլերենով, ապա սա այլևս համահայկական ողբերգություն է։ Իսկ ձայնագրության թարգմանության մեջ կարելի է հասկանալ, որ, օրինակ, Վահե անունը կամ Հարությունյան ազգանունը կարելի է հենց այդպես էլ գրել՝ Vahe, Harutyunyan, ոչ թե Vage, Arutunyan: Կիմանա Փաշինյանն՝ ինքը, թե ինչու է այս ձայնագրությունը հենց հիմա տարածվում, իր՝ Ռուսաստան այցից հետո։ Չէ՞ որ ոչ Քոչարյանը, ոչ Խաչատուրովն այս պահին կալանավորված չեն, և գոնե այս պահին ձայնագրության հրապարակումը նրանց առնվազն պետք չէ։ Միգուցե Փաշինյանը պատասխան ստացավ Պուտինի հետ զրույցում արտահայտած այն մտքին, թե չպետք է երկու երկրներն իրար գործերի խառնվեն։
Ուզենք, թե չուզենք, Ռուսաստանը խառնված է այս գործին․ Միքայել Հարությունյանն իր քաղաքացին է, Խաչատուրովը՝ ՀԱՊԿ գլխավոր քարտուղարը, Քոչարյանը՝ մեկը, ում ծնունդը Պուտինը ջերմորեն է շնորհավորում։
Հիմա այս ամենը հաշվի առնելով՝ ժամուկես ասուլիս տալ կամ եթեր մտնել ու խոսել, որ մեր դեմ քայլեր են, մեզ փորձում են կանգնեցնել, առավել ևս շահարկել կոռուպցիան, առնվազն անհեթեթ է, ծիծաղելի։ Այս ձայնագրությունն ըստ էության ցուցմունք էր իրենք իրենց դեմ, որ իրենք ազդում են դատարանի վրա և որ զուր էր ամբողջ աղմուկը։ Հայաստանում դատական համակարգը շարունակում է մնալ վարչապետի ձեռքում»։