Իրավական առումով այս նախագիծը վտանգավոր է. Գևորգ Կոստանյան
Մենք՝ պետաիրավական հանձնաժողովով դրական եզրակացություն տվեցինք և հայտարարեցինք, որ այդ դրական եզրակացությունը տալիս ենք բացառապես քաղաքական նկատառումներից ելնելով, որովհետև այդ նախագծում այնպիսի խնդիրներ կան, որ իրավական առումով այս նախագծի ընդունումն իրական վտանգ է պարունակում՝ իրավակիրառ տեսակետից: Այդ մասին Ազգային ժողովում ասաց ԱԺ Հանրապետական խմբակցության պատգամավոր Գևորգ Կոստանյանը: ԱԺ օրակարգում ընտրախախտումների համար պատիժների խստացման հարցն է:
«Մենք պայմանավորվեցինք կառավարության հետ՝ նկատի ունենալով, որ այս կառավարությունն արտահերթ նիստ հրավիրել է հենց այս հարցի կապակցությամբ, որպեսզի արտահերթ նիստը չտապալվի, մենք կողմ քվեարկեցինք՝ դրական եզրակացություն տալով, բայց պայմանով, որ իրավական առումով պետք է այնպիսի էական շտկումներ լինեն և տրամագծորեն հակառակ, որը նախագծում է ներառված: Միայն այդ դեպքում կհամարենք, որ մենք ունենք իրավական, օրինական օրենք, որը միտված կլինի, իրականում մեր ընտրական գործընթացը բարելավելուն և վստահություն ձեռք բերելու ընտրական գործընթացի նկատմամբ: Սա է մեր պայմանավորվածությունը»,- ասաց Կոստանյանը:
Նա դիմեց նաև իր գործընկերներին՝ նշելով, որ նրանք օրենքը ներկայացնելու ժամանակ հնարավորություն կունենան նաև իրենք համոզվելու օրենքում առկա վտանգավոր կարգավորումների մասին. «Առիթ կլինի, մեր գործընկերները կհնչեցնեն, որ մենք սկզբունքորեն կողմ և անհրաժեշտ համարելով, որ ընտրական օրենսգրքից բխող իրավական ակտերը կատարելագործվեն և հստակեցվեն, միանշանակ, այդ թվում՝ խստացման առումով: Բայց այս տեսքով օրենքի ընդունումն իրավական տեսակետից ես և հանձնաժողովը համարում ենք վտանգավոր»,- եզրափակեց Կոստանյանը: