Հաշվի առնելով Վերաքննիչի որոշումը անձեռնմխելիության մասին՝ Քոչարյանի նկատմամբ խափանման միջոց ընտրելու որոշումն օրինական չէ. պաշտպան
Մենք էլ ենք ԶԼՄ-ներից, քննչական մարմնից ենք տեղեկացել, որ համապատասխան փաստաթղթերը փոստով ուղարկվել են, որոնց հիման վրա պետք է գնալ և ստորագրել կամ իրականացնել համապատասխան գործընթացը՝ ստորագրություն չհեռանալու վերաբերյալ: Այդ մասին լրագրողների հետ զրույցում ասաց Ռոբերտ Քոչարյանի պաշտպաններից Արամ Օրբելյանը:
«Դեռևս չենք ստացել և քանի դեռ որոշումը չկա, չեմ կարող մեկնաբանել որոշման որևէ դրույթ ինչքանով է հիմնավոր, ինչքանով՝ ոչ հիմնավոր: Կարող եմ ուղղակի նկարագրել, որ հաշվի առնելով Վերաքննիչ դատարանի որոշումն առ այն, որ առաջադրված մեղադրանքների մասով գործով գործում է անձեռնմխելիությունը և համապատասխանաբար այդ առաջադրված մեղադրանքների մասով չի կարող իրականացվել քրեական հետապնդում որևէ այլ գործողությունը, որը միտված է հետապնդման, իսկ խափանման միջոցի կիրառումը նույնպես համարվում է քրեական հետապնդման գործողություններից մեկը, նախնական գտնում ենք, որ օրինական չէ»,- ասաց Օրբելյանը:
Ըստ նրա՝ որոշումը տեսնելուց հետո միայն մանրամասն գնահատական կտան, եթե կլինի այն, ինչ կարծում են՝ կբողոքարկեն. «Իրավական գործիքակազմը հետևյալն է. կլինեն որոշումներ, համաձայն չենք համաձայնի՝ կբողոքարկենք, կլինեն որոշումներ համաձայն կլինենք՝ չենք բողոքարկի»:
Օրբելյանը նշեց, որ Քոչարյանի հետ այսօր նաև քննարկում են ունեցել. «Եթե կգա որոշումը, անկախ նրանից՝ ինչ հիմնավորումներ լինեն, նպատակ չունենք խոչընդոտել, խանգարել գործընթացներին, եթե կարիքը լինի՝ ստորագրությունը կտրվի, որոշումը տեսնելուց հետո կկարողանանք գնահատական տալ»,-նշեց պաշտպանը: