Խոշոր խնդիրների լուծում ակնկալել այս կառավարությունից՝ լուրջ չէ. տնտեսագետ
Աշխատավարձերի ու կենսաթոշակների բարձրացում և այլ խոշոր խնդիրների լուծում ակնկալել այս կառավարությունից լուրջ չէ:
Այս մասին այսօր՝ օգոստոսի 31-ին, լրագրողների հետ հանդիպմանն ասաց տնտեսագետ Վահագն Խաչատրյանը՝ անդրադառնալով կառավարության 100 օրվա ձեռքբերումի ամփոփմանը:
«100 օրվա ձեռքբերումը տնտեսական քաղաքականության մշակույթի նոր ձևավորումն է, որի հիմնական շեշտադրումներն են՝ տնտեսությունը կոռուպցիայից զերծ պետք է լինի, մոնոպոլիաներ չպիտի լինեն... բայց մասնագիտական առումով պետք է գնահատել այս կառավարությունն պատրա՞ստ է այդ խնդիրների լուծմանը, թե՞ չէ»,–ասաց տնտեսագետը:
Խաչատրյանը բացասական համարեց ցորենի ներկրման այլընտրանքի բացակայույթունը. «Այլընտրանքի բացակայությունն ինքնին վատ է և այստեղ կառավարությունն անելիք ունի».-նշեց տնտեսագետը։
Նրա խոսքով՝ թվային տվյալները չէ, որ պետք է ոգևորեն, քանի որ կան դեռևս լրջագույն խնդիրներ, ինչպիսին է օրինակ՝ գործազրկությունը։ Միևնույն ժամանակ Վահագն Խաչատրյանը շեշտեց, որ եթե միայն կոռուպցիան որ վերանա, բավարար կլինի, որպեզի տնտեսության մեջ հաջողենք:
«Պետք է մտածել ներմուծման և արտահանման շուկաները դիվերսիֆիկացնելու ուղղությամբ: Պետք է նայել ո՛չ միայն Ռուսաստան, այլ նաև Թուրքիա, Իրան, Միացյալ Նահանգներ, Եվրամիություն։ Մեզ շրջապատող երկրներում տեղի է ունեցել արժույթի արժեզրկում, ՀՀ–ում տեղի չի ունեցել, այսինքն նշանակում է մեխանիկորեն մենք կորցրել ենք արտահանման մրցունակությունը»,-մկատում է նա՝ հավելելով, որ մեր արտահանման տեմպերը, վերջին 6 ամսվա ընթացքում, նվազել են. դա կարող է մտահոգվելու տեղիք տալ։
Ինչ վերաբերվում է համաշխարհային տնտեսական միտումներին, ապա գործող կառավարությունը նախանձելի վիճակում չէ՝ հաշվի առնելով ԱՄՆ կողմից սահմանվող մաքսատուրքերն ու պատժամիջոցները։
«Այստեղ նաև այլ խնդիր կա. դեռեւս անհասկանալի է կառավարության համար տնտեսական առաջնահերթությունը հանքարդյունաբերությո՞ւն է, զբոսաշրջությո՞ւնը, թե՞ արդյունաբերությունը»։