Հանուն արդարության պետք է ասել՝ Աշոտյա՛ն, դու ճիշտ ես
Ազգային ժողովն այսօր առաջին ընթերցմամբ ընդունեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին օրենքի նախագիծը:
Սա այն խնդրահարույց օրենքի նախագիծն է, որն ընդունելու պարագայում Սևանա լճից այս տարի կիրականացվի ոչ թե 170 մլն խմ, այլ 210 մլն խմ հավելյալ ջրառ:
Թեև օրենքի նախագծի հիմնական զեկուցող՝ Ջրպետկոմիտեի նախագահ Ինեսսա Գաբայանը նախագծի ներկայացմանը պատրաստվել էր «մատների արանքով», և, ըստ էության, չկարողացավ պատասխանել պատգամավորներին հուզող հարցերին, սակայն այսօր Հանրապետական կուսակցությունն իր պահվածքով ապացուցեց, որ պատրաստ է համագործակցել իշխանության հետ՝ չընդունելով անգամ նրա կողմից առաջ քաշած գեթ մեկ թեզ:
ԱԺ ՀՀԿ-ական պատգամավոր Արմեն Աշոտյանը Սևանա լճի մասին նախագիծն օգտագործեց՝ ևս մեկ անգամ մի քանի «ապտակ հասցնելով» Փաշինյանի կառավարությանը:
«Գործող իշխանությունը ստիպված է կրկնում նախորդ իշխանությունների կողմից ձեռնարկվող նախագծերն ու փոփոխությունները, չնայած՝ մինչ վարչապետի և կառավարության պատասխանատվության ստանձնումը քննադատում էր, ուստի, քաղաքական տեսակետից ակնհայտ է, որ ներկայիս իշխանությունների՝ նախորդները վատն են տեսակետը չի դիմանում անգամ 100 օրվա քննադատությանը»,-իր ելույթում ասաց պատգամավորը՝ Ինեսսա Գաբայանին հասկացնելով, որ Սևանից 240 մլն խմ հավելյալ ջրառ իրականացնելու՝ կառավարության որևէ հիմնավորում իր համար համոզիչ չէ:
Աշոտյանը շտապեց կառավարությանը հիշեցնել, որ Հանրապետականի՝ իշխանություն եղած տարիներին Սևանա լճի ջրի մակարդակը բարձրացել է 4 մետրով.
«Հատկապես, եթե 3-4 մետր բարձրացմանը մենք նախորդ 17 տարիներին հասել ենք, հատկապես, երբ ջրի որակը բարելավվել է, հատկապես, երբ ջրամբարաշինության և Արփա-Սևանի կառուցման համար պետական միջոցներ չեն խնայվել»,-ասաց Աշոտյանը՝ իշխանությանը խորհորդ տալով տեղի-անտեղի չխարազանել ընդդիմությանը:
Հանուն արդարության պետք է ասել՝ «Աշոտյա՛ն, դու ճիշտ ես»:
Կառավարությունն, իսկապես, իր ոչ պրոֆեսիոնալ ու «ձվից նոր դուրս եկած» կադրերով դեռևս չի կարողացել աչքի ընկնել նոր գաղափարներով, և նման կադրային քաղաքականության պարագայում դա բնական է. գաղափարի համար նախ համապատասխան փորձ ու հմտություն է պետք, փորձառուներին լսելու կարողություն է պետք, որոնց բացակայությունը բերեց նրան, ինչի մասին այսօր ասաց Աշոտյանը
Այո՛, երկրի արտաքին քաղաքականությունն ընթանում է ՀՀԿ-ի նախագծած ուղով, ներքին քաղաքականություն՝ գրեթե, չկա, իսկ տնտեսական քաղաքականության մասին խոսելն էլ անիմաստ է, և ներկայիս կառավարությունը դեռևս չի սթափվել և դուրս չի եկել հրապարակի ազդեցության տակից:
Ու թեև Գալուստ Սահակյանն ասում է, որ «հակահեղափոխություն չկա, Լենինի ժամանակնե՞րն են ինչ է», սակայն, հակահեղափոխությունը կա և այս տեմպերով շարունակվելու պարագայում սպառնում է ոչնչացնել հեղափոխության կապիտալիզացիան: