«Թագավորը մերկ է»՝ ասող չկա․ Գեղարքունիքի մարզպետն ու առողջապահության նախարարը «հանվել են» բոլորի առաջ (տեսանյութ)
Երբ վարչապետն այլակարծության ու ազատ խոսքի համար Հանրապետության հրապարակի հարթակից մատ էր թափ տալիս բոլորի վրա ու սպառնում, թե՝ տեսե′ք, ԱԱԾ-ն ձեր դուռն էլ չթակի, նա դա ինքնանպատակ չէր անում։ Նրա նպատակն է քողարկել իր կառավարության ներկայացուցիչների բացերը։
Իրականում բացթողումներն այնքան շատ են, որ դրանց մասին բարձրաձայնելն իսկապես կարող է դիտարկվել որպես «հանցագործություն», որն արժանի է ԱԱԾ-ի ուշադրությանը։
Ու որպեսզի ԱԱԾ-ն մեր դուռն էլ չթակի՝ խոսենք ո՛չ թե գործից, այլ պահվածքից։
Հին իշխանության օրոք, ամառվա դեռ սկզբին, բոլոր լրագրողներն ակտիվ սկսում էին հարցազրույցներ պատգամավորների, նախարարների ու մարզպետների հետ, որպեսզի իմանան, թե որտեղ են հանգստանում նրանք և սկսում էին քննադատել, եթե նրանք իրենց հանգստյան ծախսերի մեջ շռայլ էին լինում։
Նոր իշխանության դեպքում՝ հարցումների կարիք չկա՝ մի կողմից մատ են թափ տալիս, մյուս կողմից էլ ծախսերի շռայլության մասին թեև տվյալներ չեն տալիս, բայց փոխարենը ֆեյսբուքյան, բառի բուն իմաստով, բաց լայվերով, իշխանության ներկայացուցիչները հանրության աչքի առաջ են։
Օրինակ՝ Առողջապահության նախարար Արսեն Թորոսյանը հրապարակել է, թե ինչպես են ինքը և Գեղարքունիքի մարզպետ Իշխան Սաղաթելյանը բաց մարմնով (կիսամերկ) շրջում Սևանի ափին ու լողանում։
Չէ՛, իհարկե՛ հասկանալի է պաշտոնյաների անմիջական շփումը հասարակության հետ, բայց մերկ ու տձև մարմինն ի ցույց դնել հասարակությանը, կարծում ենք՝ հարիր չէ ոչ մի իրեն հարգող մարդու, առավել ևս՝ պաշտոնյայի։
Հատկապես Գեղարքունիքի մարզպետի դեպքում, տհաճ է, թե ինչպես է նա իր հաստափոր կազմվածքով շրջում ափին ու ինքնագոհ քորում կլոր փորը։
Իհարկե, կլինեն նաև ոմանք, ովքեր արտառոց ոչինչ չեն տեսնի մարզպետի պահվածքի մեջ ու կասեն, թե՝ ի՞նչ անենք, մարդը գնացել է հանգստանալու, հո շորերո՞վ չէր լողալու։ Բայց այս քննադատության համար առաջինը թող քար նետեն նրանք, ովքեր ղեկավարելով մի ամբողջ հաստատություն՝ մերկ կքայլեն իրենց աշխատողների դիմաց, կնկարահանեն դա ու կհրապարակեն սոցցանցում՝ անկախ այն բանից, թե որտեղ են գտնվում։
Մյուս կողմից էլ՝ գուցե նախարարն ու մարզպետն այդքան «դուխով» մերկ շրջել են լողափի՞ն, քանի որ վստահ են եղել, որ «Թագավորը մերկ է» ասող չի լինի․․․
Արմինե Մկրտումյան