Պաշտոնական դիրքի չարաշահման պատճառով համակարգից հեռացված պաշտոնյան նորից պաշտոն է ստացել
ՀՀ ոստիկանության պետի 2018 թ. հուլիսի 21-ի հրամանով ՀՀ ոստիկանության Պետական պահպանության գլխավոր վարչության վարչության պետ է նշանակվել ոստիկանության գնդապետ Արթուր Էդիկի Խաչատրյանը:
Հետաքրքրական է, որ ոստիկանության համակարգում նման կարևոր պաշտոն զբաղեցրած պաշտոնյան շուրջ երկու տարի՝ 14.04.2016-01.02.2018թթ՝ գրանցված է եղել կադրերի ռեզերվում, պատճառն այն է, որ Արթուր Խաչատրյանը նախկին ոստիկանապետի հրամանով կադրերի ռեզերվ էր ուղարկվել՝ պաշտոնական դիրքի չարաշահման պատճառով:
Այսպես, բավականին երկար ժամանակ՝ 06.06.2011 - 23.02.2016 թթ, Արթուր Խաչատրյանը Պետական պահպանության գլխավոր վարչության Կենտրոնական պահպանության բաժնի պետն է եղել, այնուհետև տեղափոխվել է Էրեբունու պահպանության բաժնի պետ, որտեղ ընդամենը մեկ ամիս է պաշտոնը զբաղեցրել:
Ըստ որոշ տեղեկությունների՝ Արթուր Խաչատրյանն ու իր հաշվապահը՝ Կարինե անվամբ, աշխատանքից ազատվել են, երբ ստուգումների ընթացքում չարաշահումներ են բացահայտվել: Կան նաև տեղեկություններ, որ սկանդալի մեջ հայտնված Արթուր Խաչատրյանը չարաշահումներ իրականացնելիս մենակ չի գործել, նրա անվան հետ կապվում էր նաև այն ժամանակ Պետական պահպանության գլխավոր վարչության պետ ոստիկանության գնդապետ Վարդան Մինասյանի անունը, ով ևս նույն դեպքի պատճառով Վլադիմիր Գասպարյանի հրամանով կադրերի ռեզերվ է ուղարկվել, վերջինս դեռևս ռեզերվում է:
Սկանդալային պաշտոնյաների ետ վերադարձը լրջագույն խնդիրների առաջ կարող է կանգնեցնել համակարգը, իսկ Նոր Հայաստանի ընդհանուր գաղափարը չվարկաբեկված մարդկանցով պետական ապարատը հագեցնելն էր:
Ի՞նչ կփոխվի Հայաստանում, եթե ոչ թե արմատական փոփոխություններ արվեն, այլ՝ փոխատեղություններ: Բնականաբար, կմնա այն, ինչ եղել է՝ կշարունակի ծաղկունք ապրել կոռուպիցան, կաշառակերությունը, չարաշահումները, ատկատն ու անարդարությունը: