«Ձեր քայլերը ՀՀԿ-ից ոչ մի բանով չեն տարբերվում, սաղ ձևական ա»․ վարորդները դժգոհ են անցկացվող մրցույթի պայմաններից (տեսանյութ)
Հյուսիսային Ավտոկայանում անցկացվող մրցույթից վարորդներն այնքան էլ գոհ չէին։ NEWSPRESS.am-ի հետ զրույցում շատերը նկատեցին, որ, իհարկե, մրցույթը պետք է, ու լավ է, սակայն կան որոշ հարցեր, որոնք հաշվի չեն առնվում։
Այս մրցույթին մասնակցում են 24 կազմակերպության ավտոմեքենաներ, որոնք իրականացնում են փոխադրումներ՝ դեպի Ռուսաստան, Վրաստան և Իրան։
Տրանսպորտի, կապի և տեղեկատվական տեխնոլոգիաների նախարարությունը, ամենամյա ստուգումներով, 10 բալանոց համակարգով գնահատում է ավտոբուսների ու միկրոավտոբուսների սրահները, հարմարությունները, վարորդների թիվը, մեքենաների տարիքը, դրանց տեխնիկական վիճակը։
Հարկ է նկատել, որ գնահատող հանձնաժողովը սահմանափակվում էր միայն մեքենայի դիմապակուն առկա կտրոնը ստուգելով, իսկ եթե կտրոնը չկա կամ ժամկետանց է, ապա մեքենան ստանում է զրո գնահատական և հանվում մրցույթից, ինչն իր հերթին նոր խնդիրներ է առաջ բերում։
Ու չնայած փոխնախարար Արմեն Փամբուխչյանը լրագրողների հետ զրույցում նշեց, որ ստուգումները ձևական չեն, ինչպես շատերն են պնդում, ու դժգոհություններ էլ չկան, սակայն հենց այդ պահին լսվեց վարորդներից մեկի բարձր ձայնը․ նա դժգոհում էր մրցույթի ընթացակարգից։
«Ձեր քայլերը նույն ՀՀԿ-ի տենդերն ա, ոչ մի բանով չի տարբերվում․․․ սաղ ձևական ա»,- ասաց վարորդը, ով չցանկացավ նկարահանվել, սակայն առանց տեսախցիկի ներկայացրեց խնդիրը։
Մանրամասները՝ տեսանյութում․