Մոսկվայում 3 հայ քույրերը սպանել են իրենց հորը սեռական ոտնձգության պատճառո՞վ․ Մի առեղծվածային սպանության հետքերով
Հուլիսի 27-ի երեկոյան Ռուսաստանի Դաշնության մայրաքաղաք Մոսկվայի հյուսիս-արևմտյան թաղամասի բնակելի շենքերից մեկի մուտքի մոտ հայտնաբերվել է 57-ամյա տղամարդու դի, որի վրա եղել են բազմաթիվ կտրող-ծակող գործիքներից ստացված վնասվածքների հետքեր՝ պարանոցի ու կրծքավանդակի մասում։ Արդեն հաջորդ օրը տեղի ոստիկանությունը ձերբակալեց մահացածի 3 դուստրերին, ովքեր համապատասխանաբար 17,18 և 19 տարեկան էին։ Ինչպես տեղեկացնում է Ria.ru լրատվական գործակալությունը, արդեն սպանության հաջորդ օրը մահացածի աղջիկներից մեկն ինքն է զանգել ոստիկանություն։ Հարցաքննության ժամանակ աղջիկներն ընդունել են իրենց մեղքն ու նշել․ «Եղել են անձնական թշնամանքի տարրեր, որոնք երկար ժամանակ բարոյական ու հոգեբանական տառապանք են եղել մեզ համար»։ Քույրերին արդեն իսկ մեղադրանք է առաջադրվել իրենց հորը սպանելու մեջ։
Ովքե՞ր են եղել այս ընտանիքի անդամները։
Մահացած Միքայել Խ․-ի 3 աղջիկներն են․ 19-ամյա Քրիստինան, 18-ամյա Անջելինան և 17-ամյա Վիկտորիան (կրտսեր աղջկա անունը փոխվել է): Նրանց 20-ամյա եղբայրն արդեն մի քանի տարի է, ինչ ապրում է ընտանիքից առանձին։ Նշվում է նաև, որ տղային տանից վռնդել է հենց սեփական հայրը։ Հարևանները նշում են, որ Միքայելը շատ խիստ հայր էր, որ աղջիկներին թույլ չէր տալիս տանից դուրս գալ։ Հարևանները նշում են, որ հայրը թողնում էր նրանց տանից դուրս գալ միայն դպրոց ու խանութ գնալու համար։ Աղջիկների մայրը բաժանվել է իր ամուսնուց ու արդեն մի քանի տարի է, ինչ ապրում է առանձին։ Lenta.ru-ի տեղեկություններով՝ 2015 թվականին ընտանիքն առանձնացել է, սակայն այդ ընթացքում աղջիկները շարունակել են կապ հաստատել իրենց մոր հետ ու շատ ժամանակ դա եղել է կոնֆլիկտի պատճառ։
Ի՞նչ են պատմել այս ընտանիքի մասին հարևանները
Հարևանները հայտնել են, որ Միքայել Խ․-ն եղել է քրեական հեղինակություն։ Նա պաշտոնապես ոչ մի տեղ չէր աշխատում, սակայն երբևէ չեն ունեցել դրամական խնդիրներ ու ապրել են ճոխ կյանքով։ Մահացածն ու իր աղջիկներն ապրել են 2 բնակարանում, որոնք եղել են 2-րդ և 3-րդ հարկերում։ Հարևաններից մեկ ուրիշն էլ նշել է, որ նրանց տուն անընդհատ գալիս էին շատ կասկածելի մարդիկ, իսկ մահացածը շատ հաճախ բակում շրջում էր զենքը ձեռքին, վախեցնում բոլորին։
Սպանության վարկածները
Այն բանից հետո, երբ ձերբակալվեցին աղջիկները, ի հայտ եկավ մի վարկած, ըստ որի՝ առաջինն աղջիկների հայրն է դանակով հարձակվել աղջիկների վրա և անգամ մեկին վիրավորել է։ Այս վարկածն աղջիկները հերքեցին ու ասացին, որ այդպիսի բան չի եղել։ Lenta.ru-ին մոտ կանգնած աղբյուրները նշել են, որ այդ վարկածը չի համապատասխանում իրականությանը։ Ավելին, նրանք նշել են նաև, որ մահացածին բոլոր մարմնական վնասվածքները հասցրել է կրտսեր աղջիկը։
Միևնույն ժամանակ, հասցված բոլորը վերքերն այդքան էլ մեծ վնաս չեն հասցրել, բացի սրտին հասցված վերջին հարվածից, որը մահացու էր: Հարկ է նշել, որ եթե այդ տեղեկությունները հաստատվեն, ապա կարող է ապացուցվել, որ հանցագործությունը նախօրոք պլանավորած է եղել։ Իրականում անչափահաս Վիկտորիային կսպասի ավելի մեղմ պատիժ, քան մյուս քույրերին։
Ի՞նչ է հայտնաբերվել մահացածի բնակարանում
Մահացածի բնակարանում ու դրա տարածքում հայտնաբերվել է զենք, զինամթերք, ինչպես նաև թմրադեղեր։ РИА Новости-ն նշում է նաև, որ տան անկյուններում հայտնաբերվել են արձակված գնդակների հետքեր։ Նշվում է, որ տղամարդը տան մեջ կրակում էր այն ժամանակ, երբ չէր կարողանում կառավարել իրեն։
Սպանության վարկածներից մեկը հոր կողմից իրականացված սեռական բռնությունն է եղել
Թե ինչն է դրդել քույրերին սպանել իրենց հորը, մինչ հիմա մնում է առեղծված։ Lenta.ru-ի տեղեկություններով՝ հարցաքննության ժամանակ աղջիկները նշել են, որ իրենց հայրն իրենց նկատմամբ սեռական ոտնձգություն է իրականացրել։ Սակայն այս վարկածը սկսեց կասկածի տակ դրվել։ Այս վարկածը ստուգվում է իրավապահ մարմինների կողմից։ Աղջիկների ընկերների խոսքերով` աղջիկներն արդեն 4 տարի է, ինչ բռնության էին ենթարկվում։ Հաղորդվում է նաև, որ տարիներ առաջ աղջիկներից մեկը փորձել է ինքնասպանություն գործել, սակայն հայրը շտապել է ասել, որ նա պարզապես դեղահաբերի ազդեցության տակ է։ Մեղադրյալի ընկերուհին նշել է նաև, որ շատ բաներ անհասկանալի էին։
Ի՞նչ են պատմում աղջիկների ընկերուհիները
Աղջիկների ծանոթներից մեկն էլ նշել է, որ աղջիկները սեռական բռնությունից բացի, ենթարկվել են նաև ֆիզիկական բռնության․
«Աղջիկներն այնքան բարի են, որ նույնիսկ մրջյուն չէին կարող սպանել, սակայն հայրը նրանց արգելել է տանից դուրս գալ։ Թույլ է տվել գնալ միայն դպրոց ու խանութ։ Անկախ ամեն ինչից, աղջիկները վախենում էին իրենց հորից, քանի որ նա ամեն կերպ սահմանափակում էր աղջիկների ազատությունը։ Երբ հայրը գործուղվում էր, աղջիկներն ուրախանում էին ու երջանիկ էին։ Միգուցե նրանց մայրը փախել է հենց այդ նույն պատճառով։ Կարծում եմ, որ աղջիկների հայրը մեծ սպառնալիք էր աղջիկների համար»։
Թե իրականում ինչպես են աղջիկներն ապրել այս ընտանիքում, հետաքննությունը ցույց կտա։ Իրավաբանական տեսանկյունից այս ընտանիքի հետ կապված բողոքներ ու խնդիրներ չկան։ Այս առեղծվածային սպանության հետ կապված մանրամասներն ի հայտ կգան ապագայում։
Նյութն ամբողջովին թարգմանվել է Lenta.ru կայքից