Պարտքերը տալու ժամանակը
«Քաղաքացիական պայմանագիր» կուսակցության երեկ կայացած վարչության նիստում հանգուցալուծվեց վերջին օրերին հասարակությանն ամենաշատը հուզող հարցերից մեկը՝ կուսակցությունը որոշեց Երևանի քաղաքապետի թեկնածու առաջադրել դերասան Հայկ Մարությանին:
Սա Նիկոլ Փաշինյանի պարտքի վերադարձն էր դերասանին, ով թավշյա հեղափոխության ընթացքում հասցրեց աչքի ընկնել բեմահարթակից, լիցքաթափել հրապարակի լարված մթնոլորտն ու մի քիչ էլ քայլել:
Բայց արդյո"ք այսքանը բավարար էր Երևանի քաղաքապետի պատասխանատու պաշտոնը ձեռք գցելու համար: Տպավորությունն այնպիսին է, որ նախքան Հանրապետության հրապարակում Նիկոլ Փաշինյանի կողքին կանգնելն ու ելույթներ ունենալը, նստել, մի լավ հաշվարկ են արել, իրար մեջ պաշտոններ են բաժանել, ու հիմա եկել է պտուղները քաղելու և գցած-բռնածն իրականություն դարձնելու բաղձալի պահը:
Խնդիրն այստեղ Հայկ Մարությանի՝ կառավարման փորձից զուրկ լոկ դերասանական կարիերան չէ միայն, խնդիրն ավելի խորքային է, որի ամենաուղիղ պատասխանատուն Նիկոլ Փաշինյանն է: Հենց նա է կրելու Հայկ Մարությանի անհաջողությունների առաջին հարվածն ու տապալալելու հեղափոխությունից հասարակության սպասելիքները՝ ինքն իր քայլերով ապացուցելով, որ գնում է ՀՀԿ-ի ճանապարհով՝ պետական ապարատը լցնելով միայն իր թիմով:
Այստեղ առկա է նաև մյուս խնդիրը, որը վերաբերում է միջազգային հանրության մեջ մեր ներկայացվածությանը:
Պատկերացրեք, ասենք, աշխարհի հայտնի քաղաքապետերը «գուգլում են» Երևանի քաղաքապետին ու տեսնում Մարությանի կոմիկ կերպարներն ու մի շարք անհաջող պրոյեկտներ: Խոստովանեք՝ աշխարհի առաջնորդներին, ովքեր ունեն մի քանի բարձրագույն կրթություն, ուսանել և ուսանում են լավագույն բուհերում՝ հաճելի չի լինի նման քաղաքապետի ըներակցությունը և, գուցե, նրա անլուրջ կերպարին համապատասխան էլ անլուրջ վերաբերմունք ստանա մեր Երևանը:
Հավանաբար, Հայկ Մարությանի առաջադրման վտանգներն ու ռիսկերը գիտակցում են նաև հենց «Քաղաքացիական պայմանագիր» կուսակցությունում: Պատահական չէ, որ նրանք վարչության նիստ գումարեցին և Մարությանի թեկնածությունն առաջադրեցին այն օրը, երբ ազգը հետաքրքված էր բացառապես Ռոբերտ Քոչարյանով ու նրա կալանավորմամբ. Այսկերպ նրանք փորձեցին խույս տալ ուշադրությունից և իրենց քննադատության ենթակա քայլի քննադատությունից: